Taqbaylit

Aḥeddad N Lqalus 

admin
Written by admin

Taddart n Lqalus tura trab.Qqaren asmi-tt mazal tebded, yella deg-s yiwen uḥeddad yesεa cci, yerna γur-s tameṭṭut tzad di ṣṣifa.Yiwen wass qqimen kra n lγaci la heddren di tejmaɛt, inṭeq-d yiwen yenna-as :

-Lemmer ad iyi tcehhdem, ad-kkseγ i uḥeddad tameṭṭut is.
Nnan as: – I kecc s lεaqel ik?
Yenna-asen: Ṛeggemt iyi kan ar ad yi-tcehdem. Ṛeggemn-as( weɛden-as) .
Iruḥ ar tejmaɛt n ccraε,yenna-asen:
-Sliγ i uḥeddad yebra i tmeṭṭut is n tlata fi tlata.
Ihi yekks as-tt ccraε. Aqli nekk bγiγ ad tt-aγeγ.
Nnan as : – D lmuḥal !
Yenna yasen ayen ẓṛan medden .
Nnan as : -Awid inagan .

Iruḥ yewwi-d inagan widen akken i as-iṛeggmen di tejmaɛt. Cehden as. Tajmaɛt teḥkem tennebra tmeṭṭut. Truḥ. yuɣ- itt urgaz-nni. γer taggara uγalen armi kksen i uḥeddad ula d tiferkiwin is.

Tella di taddart n Lqalus yiwet temγart tegra-d waḥd-s, ur tesεi ḥedd. Tewwḍ-d tefsut; bdan medden la teffγen γer tferkiwin-nnsen. Ala tamγart nni acku ulac wara  teğğ deg uxxam is . Ass-nni truḥ, s aḥeddad tru-yas. Yenna-yas :
-Ma tebγiḍ ad am-ggeγ ttawil.
Tenna-yas :- Lemmer ad txedmeḍ tinna…
Yenna-yas :- Ad am-xedmeγ tasekkart ara yetteskkiren axxam-im si beṛṛa.
Di lweqt-nni tiwwura ttsekkirent kan si sdaxel.At taddart, akken walan tamγart, mi tsekker tawwurt-is ad truḥ bdan ar d-ttazzalen γer uḥeddad iwakken ad asen-ixdem tisekkarin si beṛṛa ula d nutni.
yexdem- itent, maca mkul yiwet yuqem-as snat n tsura, yiwet yeğğda-tt γur-s.
Yiwen n wass amesbaṭli-nni d tmeṭṭut-is txuṣṣ-iten tmes,yenna-yas i tmeṭṭut:
-Ruḥ awi-yaγ-d tmes sγur uḥeddad .
Tenna-yas :- Annaγ! Anwa udem iyes ara t-qableγ?
Yenna-yas :- Nniγ-am ddem aceqquf truḥeḍ.
Truḥ. Mi tewweḍ  tbedd, tegguma ad tqerreb. Aḥeddad iwala-d tili,yenna yas :
-Qerreb-d.
Tenna-yas nekk!
Ynna yas :- Nniγ am qerreb-d.
Tenna-yas :-Nniγ-ak d nekk.Ur yi-d teεqileḍ ara.
Yenna-yas : -ẓriγ d kemm, qerreb-d.
Tekcem, tenna-yas:
-Acu la txeddmeḍ a bu nnkuz ?
Yerra as s tmeγrut agi (-uz-).

Xeddmeγ i medden akk lxir
nekk d aḥeddad si Lqalus

Ul-iw Yettagem ineqqel
ha-t-a di lhemm ur ixus

Ad kun ttreγ a lawliya
At Mraw akk d wat Ɛrus

Aqli la neğğṛeγ azduz
Ay at Ṛebbi get- as afus

Tuγal tmeṭṭut s axxam. Yenna-yas urgaz is:
-Acu i kem-id-yenna?
Teḥka- yas, tεawed-as ifyar i as-d-yenna uḥeddad. Yenna-yas:
-Tettakeḍ awal i bu tirgin!
Tama n Lqalus tella yiwet n taddart temsaεdaw yid-s; wwḍen armi qrib i tt-xlan. Iruḥ yiiwen n wass uḥeddad γer yimḍebbren n taddart-nni, Yenna-asen:
-Ayen iḍran yidi teẓram-t.Tura ma tebγam ad awen-zenzeγ taddart, ad tt-texlum.
Nnan as : -Amek?
Yenna yas : -Ilaq taεessast-nwen mkul iḍ ad n-tqaraε s-axxam-iw; Mi ten-n-twalam γer ṭṭaq ajajiḥ n tmes azzelt-n.
Yiwen iḍ aḍu la issafag iqremyad. Medden akk tṭsen. Aḥeddad yekker, yebda-d i taddart si ṭṭerf. Axxam iγef iεedda isekker as tawwurt si berra.Yuli γer taεrict n uxxam is, yeddem tadla n yiɣlel,yessaɣ- itt, yessεedda-tt-id si tṭaq. Aεdawn walan-d ajajiḥ mebεid, auzzlen-d s sslaḥ.Zzin i taddart-si mkul idis, mekknen-as times.Tendeh, tleḥḥu armi d- yewweḍ s ixxamen imezwura n taddart.Laεyaḍ yekker.Win yemmγen ɣef tmekwḥelt, ad iruḥ ad yeldi tawwurt, ad tt-yaf  tsekkeṛ si beṛṛa.

Akka i tenger taddart-a n Lqalus.