Taqbaylit

Lɣeṛba, ma ad tenɣ Tmurt n Yeqbayliyen ?

admin
Written by admin

Anelmad iṛuḥ, axeddam iṛuḥ, acumur iṛuḥ, argaz s twacult iṛuḥ, ṛuḥen akk, nennejla akk ; tamurt tuɣal d lxali. Tseḥḥer-aɣ lɣeṛba, yestulles-aɣ l’occident; d tidet nelluẓ aɣṛum, maca nelluẓ daɣen zzhu, tayri, tilelli, tudert.

Tumant-agi n lɣeṛba di tmurt-nneɣ mačči n wass-a, imezwura i izeggren lebḥar, d agrakal i zeggren ɣeṛ Fṛansa di 1905. Wid iṛuḥen di tallit-nni, d llaẓ i d-iḍefṛen amḥaq n tanekra n Lmuqṛani d Uheddad n 1871 mgal tamharsa tafṛansist i ten-yewwin. Llan d ixeddamen di lminat, deg icuntyiten, di lluzinat. Di tallit-nni, d argaz kan i yettjaḥen, tawacult tettɣimi di tmurt ; mi i d-iḥella azeɣbub ad asen-t-id-iceyyeε.


Syin akkin, tella-d yiwwet n lmuja nniḍen seld 1962 ; nesḥaḥi Fṛansa nessuffeɣ-itt si tmurt, tagara nedda deg ijufaṛ-is. Wigi daɣen di tazwara d axeddim i ten-yewwin, ṛuḥen d iwḥiden, nwan ad qqimen kra iseggasen, mi i d-refden iman-nsen ad uɣalen ɣer warraw-nsen maca, deg 1976 iεedda uṣaḍuf n ‘’le regroupement familial‘’ di tmurt n Franṣa di tselwayt n Valérie Giscard D’Estaing ; lqaqnun-agi d win yefkan azref i yixeddamen ibeṛṛaniyen ad awin u ad skecmen tiwaculin-nsen ɣeṛ Fransa akken ad ilin lwaḥid. Ay-agi d ayen i ten-yeǧǧan ur d-ttuɣalen ara, imi ayen yak i izemren ad ten-icudd ɣeṛ tmurt, atan tura ger wallen-nsen.

Mi ara nemmuqel iseggasen-agi ineggura labaεda seld 2001, nettwali belli yugar icerrig tafawet, qelεen yak yelmeẓyen. Wid mazal di tmurt, ttargun ad ḍefṛen wid iṛuḥen.


Lɣeṛba tuɣal d tamurt, tamurt qṛib ad tuɣal d lɣeṛba. Tuget n inaẓuṛen Iqbayliyen zedɣen di tmura n lbeṛṛani; icennayen cennun di tzeqqiwin n Fransa d Canada, lketra deg-sen ttagin ad ɣennin di tmurt, tamurt ur tessidir ara inaẓuṛen-is. Nettwali am akken d timetti taqbaylit s lekmal-is i d-yeǧǧan tamurt. Aẓeṭṭa n tidekliwin tidelsanin yellan di Fṛansa akk d Canada yugar aṭas leqdic i d-yettilin di tmurt, anda xuṣṣen wallalen, xuṣṣen isurdiyen.


Tura ma nessekcem ciṭ tasertit deg uxemmem-nneɣ, ad nwali belli adabu azzayri yeffeɣ fell-as xellu-agi n Tmurt n Yeqbayliyen, yezmer d afus-is maḍi i yellan deffir-s; yak anmahal n Fṛansa di tmurt n Lezzayer yenna-d yiwwet n tikkelt d akken ugar n 70% n lbizat i d-tettak Fṛansa i yizzayriyen, ttṛuḥunt ɣer Tmurt n Leqbayel. Afus deg ufus, amhersan n yiḍelli d umharsan n wass-a msefhamen ɣef uqeṛṛu n Tmurt n Yeqbayliyen. 


Deg tama tayeḍ, adabu n Lezzayer yettak ixxamen i waεṛaben di tmurt n leqbayel, cwiṭ cwiṭ yesfegruruc akal aqbayli ; aɣerbaz n tiεuṛṛebt, tasnislemt n leǧwameε ṭṭfen isalafiyen yak d tadbelt ad kemmlen i wayen i d-yeqqimen n teqbaylit.


Ma nkemmel deg ubrid-agi i d-newwi, ass ad yas i di tamurt ad tbeddel udem, ad tbeddel imawlan, ad tbeddel ahat ula d isem, ad tuɣal, mačči d tamurt-nneɣ, mačči d Tamurt, d tamurt kan. Assen, abrid n tuɣalin ad yergel fell-aɣ, arraw-nneɣ ad asen-yettwagzem waẓaṛ.

Tagduda Taqbaylit, lebni ines ad yili di Tmurt n Yeqbayliyen mačči di Fṛansa, mačči di Canada, mačči anda nniḍen, ad tt-nessali neɣ ad nenger. 

Stulles=éblouir
Tadbelt=administration
Tumant=phénomène
Tamharsa=colonialisme
Yesfegruruc=grignoter

Aḥeddad