Taqbaylit

Tislit n Da Caɛvan tessidig ifecka ar Teqbaylit.

admin
Written by admin

Da Caɛvan, d argaz ḥemlen warraw n taddart-is. Ḥemlent imi yennecraḥ. Ɣas akken deqs i d-yeṭṭef seg insayen iqbuṛen (anciennes traditions) n tmurt, acu kan hraw wul-is. Da Caɛvan yewi-d tameṭṭut i mmi-s Yugurten semmus (5) n iseggasen aya. Tislit-is qarren-as Tafrara.
Ass-mi d-wweḍ Tafrara s axxam, tegdeh aṭas imi ula d yiwen deg uxxam n wergaz-is ur yeqqin ar uẓeṭṭa Internet (réseau).  Nettat teɣra taneflit Web (Développement Web). Deqs i tesnefli (développer) n ifecka (outils) Web s useqdec n tetiknulijiyin Web am HTML, CSS akked JavaScript. Yerna daɣen tessen ula d Python, yiwet n tutlayt n usihel (language de programmation) I yettuseqdacen s waṭas iseggasen-agi ineggura.

Wagi dayen tessen Tafrara deg akud-nni, semmus n iseggasen aya. Ass-a d ayen-nniḍen.

Tafrara twala d akken imdanen n taddart ur ssinen ara Taqbaylit tatrart. Ihi, thegga-d yiwen n wahil akken ad tessali aswir n twacult-is akked imezdaɣ n taddart n wergaz-is. 

Da Caɛvan yettzuxxu s teslit n mmi-s gar yergazen di tejmaɛit. Yeqqar-asen, wwiɣ-d agerruj i mmi. Ihi ula deg taddart, tilawin akk sawalen-as Lala Tafrara imi ttqadaren-tt aṭas.

Seg ass-mi d-kcem Tafrara ar taddart, tudert n imdanen tbeddel. 

Tafrar tuɣal d tanedbalt n tutlayt Taqbaylit deg deqs n isenfaṛen deg Web. Tessuqul, tessidig s tutlayt-is: Taqbaylit.

Tafrara tseqdac deqs n wanawen (types) n ifecka n tsuqilt. Ifecka n tsuqil srid deg Web, neɣ ifecka idiganen (locaux).

Deg tazwara, Tafrara tseqdec asmel Tansifex. Asmel-agi, d anagraw n usefrek n tsuqilt (Système de gestion de traduction). Ɣur-s yiwen n ugrudem (interface) fessus nezzeh. Send ad tebduḍ tasuqilt, yessefk amdan ad yernu amiḍan(compte). Ticki yettwasentem (confirmer) umiḍan, aseqdac (l’utilisateur) yezmer ad yeqqen. Deg usmel-agi, deqs n ifecka (outils) akked yesnasen (application) ttuheggan i usideg (localisation) s Teqbaylit.

Tafrara tefren kra n yesnasen. Deg tazwara, tenna ttif axir limer ad nheggi ifecka iseqdacen tugett n yemdanen am iẓeḍwa n tmetti (réseaux sociaux), ifecka n usefrek n yeznan (outils de gestion de messages), ifecka n tunigin (outils de navigation), ifecka n usefrek n yeḍrisen (outils de gestion de textes), ifecka n usefrek n tezmilin (outils de gestion de notes),..atg.

Tafrar thegg-ad meṛṛa allalen-agi. Yerna deqs seg imezdaɣ n taddart-is mudden-as-d afus. Ur teqqim ara kan din. Tafrara tessaram ahat yiwen n was, aselkim meṛṛa ad ittusefrak s Teqbaylit. Tutlayt-is tayematt.

Ur d-muddeɣ ara isem n taddart n Tafrara. Taddart-is teẓram-tt akk. Qqaren-as Taqbaylit.

Muhend Belqasem.