728 x 90

Ɣef wammud « Tafunast igujilen » n Ɛmer Mezdad

Ɣef wammud « Tafunast igujilen » n Ɛmer Mezdad

Ammud Tafunast igujilen n Ɛmer Mezdad, deg-s 90 n yisefra. Yules-as-d asizreg tineggura-agi. D tikti igerrzen mi as-yules issuffeɣ-it-id. Tagi d tazrigt tis tlata. 
Ammud-agi ɣer-s ddeqs n wazalen. Amenzu deg-sen d azal deg umezruy n tsekla s umata, d win n tmedyazt akkya. Wis sin d azal deg usedyez aqbayli (poétique kabyle). Wis tlata d azal yerzan assaɣen yellan gar yisefra n Ɛmer Mezdad d tira-ines di tesrit ama d ungal ama d tullist. Llan wazalen nniḍen… ma nmeslayen-d ɣef tlata-agi i d-bedreɣ ddeqs yakan.
Tafunast igujilen d netta i d ammud amenzu i d-yeffɣen deg umezruy n tsekla taqbaylit. Mačči kan d aya : ma ur ɣliḍeɣ, d netta i d adlis amenzu ideg agbur d asnulfu aseklan i d-yura umdan aqbayli. Yeffeɣ-d tikkelt tamenzut deg useggas n 1978 di Fransa. Ittusemma : uqbel-is llan kan yidlisen i d-yettawin ɣef usiskel n tsekla timawit (transcription de la literature orale). Yezwar ula d adlis-nni n Belɛid At Ɛli (Les cahiers de Belaid ou la Kabylie d’antan) acku d netta i d adlis amenzu i isemma umeskar-ines d adlis n usnulfu udyis s lekmal-is (ur llin deg-s leṣnaf nniḍen n yiḍrisen). S wakka, ad ittuneḥsab wammud-agi, am netta am win n Muḥend Uyeḥya “Mazal lxir ar zdat” (1979), d talast tamenzut (d tagejdant) i iferqen asnulfu udyiz (s umata aseklan) n teqbaylit ɣef snat n talliyin : tallit n “uqbel adlis amenzu (n tmedyazt)” d tallit ideg bdan ttbanen-d yidlisen n usnulfu n tsekla (s tira).
Tin yernan ɣer-s, tafunast igujilen seg yidlisen imenza i d-yeffɣen di Lezzayer, di tazwara n yiseggasen n tɛecret n 1990. Am netta am yidlisen icban “Iḍ d wass” n Ɛmer Mezdad, “Askuti” n Saɛid Sadi, “Aḍar iteddi s aẓar” n Muqqran Cemim, “D acu i aɣ-yuɣen ?” n Brahim Slimani d Racid Saḥqi. Annect-agi akk ɣer-s azal d ameqqran deg umezruy n tsekla (ibedden ɣef umseḍfer n yiḍrisen deg tegnatin tidelsanin d tegnatin timazrayin).  D ayen ara yesɛun diɣen azal meqqren deg umezruy aseklan i iressan ɣef lewṣayef tigensanin n yiḍrisen (am yisental d iɣunab d telɣiwin). 

Tafunast igujilen d ammud ideg asnulfu udyiz ireṣṣa ɣef yiwen n usedyez d amaynut, ulac-it yakan di tmedyazt taqbaylit ɣas ma yella deg-s wayen i yeqqnen iḍrisen ɣer unsay udyiz aqbayli (tradition poétique kabyle). Ittusemma d asedyez atrar (poétique moderne). Yettban-d wannect-a ama deg wayen i d-ttawin yisefra ama amek i d-ttawin ama i wacu-ten, ama deg wamek tedda talɣa-nsen. Di temsal-agi n usedyez, ad ittuneḥsab wammud-agi n tmedyazt n Ɛmer Mezdad d anagi meqqren deg usmeynet aseklan (renouveau littéraire).
Taneggarut. Tafunast igujilen d adlis i yesɛan azal deg usnulfu aseklan n Mezdad acku yezmer ad iɛiwen ameɣri akken ad yefhem tira n umaru-agi, ama deg wayen yeɛnan ungalen-is ama deg wayen yerzan tullisin-ines. Kra n yimedyaten kan: tullist “D tagerfa i aɣ-tt-igan” d udem aḍrisan nniḍen n usefru “Nnan”. Asefru “Ɛli”yesɛa assaɣ d wungal “Tagrest urɣu” abeɛda deg yiḥricen-nni ittusemman “Adlis n Weɛli”. Asefru “Ad as-neḍlu abux” d awellih yelhan i tɣuri n wungal “Iḍ d wass” d wungal “Ass-nni”; yes-s ad yefhem umeɣri udem gar wudmawen n tidmi n yiwudam Muḥend d Lxuni, atg.
Isefra gerrzen, awal ad yeɣzif, nadam deg wallen yettmurud… I kunwi (kunemti), d acu i tennam(t) 

Muḥend Akli Salḥi

Source
Tafunast Igujilen

Talantikit, 2017

Azal : 250 DA

rédaction
ADMINISTRATOR
PROFILE

Voir aussi

Latest Posts

Top Authors

Most Commented

Featured Videos