Taqvaylit

​Murad Irnaten: Akka i bɣiɣ ad yili wass-nni !

Proposé par rédaction isallan


Ifer si tneqqelt yeɣli, yefser iman-is di lqaɛa. Leḥcic yellexs, ɣef yixef-is nnda yeɛluleq am uxlul. Lexrif yesselqaf, yettkersmumi seg usemmid mi yeslufuy i weɛrur-is! Agu, seg yeɣẓer yecrured-d am zzrem yettnadin d acu ara yečč!
Ixammen d isemmaḍen am wulawen n imezdaɣ-nsen. Aqermud yettiqi am imeṭṭawen n weqcic mi ara s-tettwakkes tɣawsa. Ṭṭiqan akked tewwura belɛent, sekrent, berken ɣef leɛyub d wayen sdergen yixamen. Di berra aḍu yettawi yettara, yettawi-d tizlit d ccnawi n umager n tegrest, d tikli n win iwumi yeɛreq ccɣel.

Abbu yettmir ɣer yigenni, iceṭṭeḥ yal tikkelt ideg ara d-iɛeddi waḍu. Taddart tekcem-itt tsusmi, tasusmi n ṭṭlam, ṭṭlam d-yeɣlin ɣef tikkelt am lekfen aberkan. 

Iḍ si tesmeḍ, ittban-d amzun akken yesbek am uguglu, yettheyyi usu i wedfel. Amččim iɣelli-d d iḥedren, ad tɣileḍ d tafekka n igenni i d-yefrurin ɣef tegnit! Yal iḥder seg umččim d asirem i tudert.

Tafrara mi d-tuki, tufa-d abernus yemmels, tafat tettmurud ɣef temlel n wedfel trennu ccbaḥa i wass. 

Ass yuli, iḍ yexsef deg igenni. Arrac akked yiqjan ɣer berra uzzlen, tturaren, ferḥen, ḥeḍren i tlalit n wedfel. 

Taddart mi d-tuki, tegla-d yid-s acmumeḥ deg wudmawen n imezdaɣ-is; ferḥen. 

Iberdan reglen, asalu yettraǧǧu taruẓi. Awer yili umuḍin, awer d-yeḍru wayen n dir! wid yessnen adfel, wid t-iwelfen ssnen tebrek-ines mi ara ten-iḥaz, tuffɣa ulac! Ma d wid ur t-nessin, ttwalin temlel-ines, ttḥalfun i tesmeḍ-ines, ayen nniḍen ttagint wallen ad t-muqlent. 

Iḥlulen deg tuggiwin, tafekka si tesmeḍ tessutur ayen yeḥman. Iɛeggalen yessemlal-iten wedfel, ttḥebbiren i wučči akked wayen ara tečč tmest, ini kan ur rǧǧin ara ass n wedfel, i wakken ad kkren ad d-zedmen. 

Irgazen ḥellsen, ɣer tcemlit kkren, asalu ad t-rẓen. Yezgen wass, ameččim yeḥbes, tafat tezreɛ ccbaḥa-ines, tebda tettban-d taddart. 

Irnaten Murad

About the author

rédaction isallan