728 x 90

Aṛebbit Aswel

Aṛebbit Aswel

Wagi d aqerruy n yiwen n uṛebbit, qqaren-as Aswel ; yewwi isem n wadeg-agi aswel i d-yezgan di tmurt n Yiqbayliyen deg udrar n Ǧerǧer ger Tigejda akked Taleṭṭaṭ imi zik-zik yella d abuṛkam (volcan).

Aswel, segmi meẓẓi iḥemmel aman yerɣan yuwlen, yezga deg uswel icuccuf ; imi di tallit-nni mazal ur yensi ara, yeččur d iḥlulen n tmes irekkem yesbeqbuq, u tikwal yessusuf yettḍeggir ɣer beṛṛa, ttismiḍen teqqlen d aẓru armi d-ḥejben s tɣaltin si yal tama yewwi talɣa n tkirwant (cuvette) i nttwali ass-a.

Aṛebbit-a _ Aswel _ aqbayli, aṭas n leqrun i yedder ; yesten ɣef Tmurt n Leqbayel d ugafa aferkan mgal n yinekcamen imi tazmert yesεa ur tt-sεin yirebbiten-niḍen n umaḍal s umata… acḥal n yiṛebbiten yenɣa imi ten-yesruɣuy s tmes i d-isuffuɣ seg yimi-s yal mi ara d-εefsen Tamurt.

Di tallit-nni n yiṛebbiten, illel-agi agrakal, yella kan d asif ameqran ahrawan yebḍan ger umenẓaw n Tferka d Uṛup ukkud yemseεdaw d kra n tmura am Yiṛumanen d Yeɣriqen… Asmi yeḥṣa Meɣres _ Mars, aṛebbit n umgaru (dieu de la guerre) _ yellan di tama akkin i yillel, yezger-d ɣer Tferka yebɣa ad ineyyer (affronter) Aswel ; yennuɣ yid-s ddeqs n yiseggasen, ur myagʷaren ara.

Meɣres yeččuren d tigzi d tezmert, yufa-d ansi i yas-d-tettas tezmert n tmes swayes yesseknaf ifnaten (adversaires) ines, yeḥṣa seg uswel.

Maca amek ara yexdem akken ad as-yeskew agelmim-a yeččuren d times i wakken ad t-ineɣ ad as-ireẓ lhiba yekseb s teɣzi n leqrun !?

Ixemmem ixemmem, yufa-d ; akken qqaren at zik « win yettnadin yettaf. » yufa dakken ilaq ad as-yeflu agelmim ad as-t-yessilem* (vider) seg uḥlul i t-iεemṛen, ad as-yessexsi ilizeq akken ad as-truḥ tezmert swayes iqehher icenga-ines.

Iɣewwes Meɣres, deg yigenni n umaḍal, yeffeɣ seg-s yudef di talunt, yerra srid ɣer ugensatriw (planète) meɣres ; iderreq-d seg-s takubba si tanga ur nelli da deg Udrar n Ǧerǧer umi semman Yiṛumanen di tallit-is adrar n wuzzal (le mont ferratus) seg wakken ur yezmir uwerdani ad t-id-yadef.

Yemmeɣ-d Meɣres srid s Aswel ad t-ikkes i lebda ad yethenni seg-s akken ad d-irkeḍ Tamurt ; iruḥ-d am lebraq, ur tceffeq fell-as la tiṭ n umdan wala tin n lbaz aremmaq. Yewwet-d s yixef n ssif-is s agelmin ɣer tama n unẓul n Ǧerǧer (versant sud) tefla tkirwant n uswel isanef yenxer ddaw n tmurt yenǧer asif, uzzlen deg-s yeḥlulen. Di tallit-nni qqaren-as asif azeqlan ; ma segmi semmeḍ ar ass-a, ssawalen-as Asif Asemmaḍ i d-yezgan imir-a di tmazya n Yimceddalen agezdu n Tubiret. Ma d anda akken yebbeɣ Meɣres takubba-s, tewwi isem n Anu n yiflis (le gouffre du léopard) sakkin isuddem uswel yenɣel akʷ armi d-tban telqeyt-is yenǧer iḥumal.

Aṛebbit Aswel, tezri fell-as yir tagʷnit ; yerra ɣer tama n ugafa anda mazal iḥlulen n tmes uqbel ad ismiḍen ; iεawed Meɣres ineggez si tɣaltin n yiceṛfan n wadda ɣer tid n ufella, yewwet daɣen s tkubba-s ẓẓayen taẓeyt n udrar, iḥuza wid yellan d agadir iqublen tama n ugafa (versant nord) dgedgen grarben, u yenɣel daɣen wayen d-yegʷran seg-s, u suddmen neǧren asif ɣer tama n At Wasif.

Yeεreḍ Uṛebbit Aswel ad idderbez ɣer yimi n lεinṣer iseg i d-yettgeffiε d asawen yilizeq mazal ur yensi, imir imir yezwar-it Meɣres igzem-d taqincurt si Akuker s talɣa n ukaswar (forme conique), yergel yes-s imi n yilizeq, yexsi seg wass-nni ar ass-a.

Ass-agi, ṛṛeṣfa-nni ibubben tarṣift, ur telli zik d rreṣfa wala d tarṣift, tella d tafekka n uṛebbit Aswel ; rreṣfa terṣa di lqaεa, ma d tarṣift yersen sufella-s, d aqerruy-is i yaɣ-yettrajun melmi ad nesseḥmu aswel-is, u ad t-id-nerret ; ala netta i nesεa d aṛebbit-nneɣ amaddi ara isetnen fell-aɣ seg yicenga iṭuqqten n Usammer d wid n Umalu.

* Tadyant-a, teḍra zik, ɣef wakken i yaɣ-d-ttalsen yemɣaren si tsuta ɣer tayeḍ armi i yaɣ-d-tewweḍ ɣer ta-nneɣ, ayagi i yaɣ-ttalsen, ur yelli d tumgist (la légende) ur yelli d amyi (mythe).

U segmi yeḥsa udabu amiran n Lmuṛ-Ṛadya igelden di Tmazɣa talemmast swayen i nettheggi akken ad d-nessakʷi zzher-nneɣ yegnen d leqrun, zeεma iḥemmel-aɣ, iḥemmel taɣlamt (équipe) n Leqbayel n ddabex uḍar _ JSK _ akken ad sluɣmuyen di tlemmast n ugama zegzawen icebḥen, εlayen ɣef yidurar, azwu zeddigen ur t-sεint tmura… Bnan-aɣ deg-s annar. Annar-a, rran-t ass-a d tajumma tahrawant ara yilin ar ifeḍ d tagʷest iɣummen lεinṣer n uburkam yellan zik yettfeggiḍ yesseḥmuy ulawen n Leqbayel ; bɣan-t ass-a ad yismiḍ ur yettfeggiḍ yilizeq-is ur yettawel ur irekkem ur yettkuffut am zik-is, akken ad ismiḍen wulawen n yibabiten-is ur d-yettakʷi zzher-nsen…

Kkret ad nalit s aswel !
S Aswel ad t-nsawel ad as-nsiwel
W(in) iẓran ! i ma ahat ad aɣ-d-isel
Ad d-ikker ad igriwel !

* Uriɣ-tt deg wass aɣelnaw aqbayli 14 yunyu _ 2018 _

Aɣedlal yettxerrifen

rédaction
ADMINISTRATOR
PROFILE

Voir aussi

Latest Posts

Top Authors

Most Commented

Featured Videos