728 x 90

“Agadir n Ruma” ungal amaynut n Ɛumer Ulaɛmara

“Agadir n Ruma” ungal amaynut n Ɛumer Ulaɛmara

Tasekla taqvaylit simal tettnerni s lmendad n tlawin d yirgazen i d-igren s annar n tira s tutlayt-nsent n tyemmat -taqvaylit-. D amedya n Ɛumer Ulaɛmara i d-yuγalen s wungal-is amaynut iwumi isemma “Agadir n Ruma” (Les remparts de Rome) i d-yeffγen ussan-a γer teẓrigin Achab (Tizi Wezzu).

Ɛumer Ulaɛmara ilul deg useggas 1952 deg taddart n Budafal. D amussnaw deg tfizikt (Docteur d’Etat ès sciences physiques), maca d argaz n tsekla i yefkan levγi-s i yimru dγa yura 8 yidlisen: 5 wungalen, 2 temsirin d 1 n umezruy.

Ulaɛmara yettwassen s tira n wungalen n umezruy. Seg “Agellid n tmes” 2008/ “Akkin i udrar” 2011 i d-yewwin γef yimenγi n Yiqvayliyen mgal amhares arumi deg tegrawla n 1856, γer “Tullianum -Taggara n Yugurten” HCA, 2009, i d-yewwin γef umennuγ n ugellid amaziγ Yugurten mgal Irumanen almi d asmi yettwaṭṭef γer usekref n Tullianum. Ungal wis 3 d win i wumi isemma “Omaha Beach” 2010, i d-yewwin γef tegzirt-a ideg d-rsen yiserdasen n Marikan d legniz akken ad slellin Fransa i yeγlin ddaw temharsa tanaẓit deg useggas 1944. Ungal wis 4 d “Timlilit di 62” i d-yewwin γef tallit n tegrawla deg yiseggasen imenza n timunent 1962.

Ula d ungal-a wis 5 i wumi yefka azwel “Agadir n Ruma” yedda deg lǧerra n wungalen i t-id-yezwaren, imi yules-d tadyant n Maher, yiwen ufesyan ameqqran n yimnayen Imaziγen i yeddan γer yidis n uγella n Qerṭaǧ Hannibal. Ungal-a yules-d tadyant n Maher d yimeddukal-is i yunagen seg tmurt n Wawras, zegren ilel, kecmen tamurt n Spenyul anda, γran syin ddan d iserdasen γer yidis n Hamilkar, vava-s n Hannibal, zegren idurar n Alpes almi kecmen tamurt n Ruma deg useggas – 218 send Ɛisa.

Ihi ungal-a, d tamuγli lqayen γef umezruy lqayen n tmurt n Tmazγa deg tallit-nni n Rruman. D taγuri i wayen yellan ass-a d afrag γer wayen i d-itteddun azekka. Tira tangalt n Ulaɛmara tufrar γef tiyiḍ, acku ungalen-is akk ttawin-d γef wayen i yeḍran s tidet deg umezruy, maca ileqqem-iten s ufus-is, imsel-iten s tektiwin-is akken ad asen-ifek ccvaḥa taseklant ara asen-yefken udem n wungal atrar.

Ihi taγuri igerrzen a tid d wid ara t-yeγren.

Sγur: Larbi YAHIOUN

Wahiba H
EDITOR
PROFILE

Voir aussi

Latest Posts

Top Authors

Most Commented

Featured Videos