728 x 90

Akal akken yesseblaɛ i d-yessusuf !

Akal akken yesseblaɛ i d-yessusuf !

« Ce n’est pas seulement l’homme qu’il faut libérer, c’est toute la terre… la maîtrise de la terre et des forces de la terre, c’est un rêve bourgeois chez les tenants des sociétés nouvelles. Il faut libérer la terre et l’homme pour que ce dernier puisse vivre sa vie de liberté sur la terre de liberté […] Ce champ n’est à personne. Je ne veux pas de ce champ; je veux vivre avec ce champ et que ce champ vive avec moi, qu’il jouisse sous le vent et le soleil et la pluie, et que nous soyons en accord. Voilà la grande libération païenne ”

Jean Giono, Le Voyage en Italie, Gallimard, 1953

Ass kamel lḥal yeṣḥa, iṭij deg igenni yefser, tafat-is tḥebba-d tamurt ɣer yedmaren-is. Lḥal ur yeḥmi ur semmeḍ, ɣas akken d ccetwa. Taddart tezzer di tsusmi, ɣas imezdaɣ-is di berra yakk i llan, yal wa d acu i ixeddem, yal wa yaɛna ccɣel-is. Tasusmi-nni sya ɣer da ad tt-icerreg ṣṣut n ufḍis mi yekkat uḥeddad uzzal ɣef uɛrur n ẓẓebra. Tiyitwin-nni ttemstbaɛent am tikli n ureqqas n ssaɛa; ṭṭen, ṭṭen, ṭṭen ṣṣut-nsent yettawi-t yeɣẓer ad tɣileḍ d lxiḍ n snitra .. Ṣṣut-nni d ul n taddart mi yekkat deg idmaren-is.

Tasusmi, lehna, lexwaṭer ḥlan, allaɣ yestaɛfa. Akken kan tebda taddart tettuḥmad, ass yenẓef, yesreɛreɛ-d ccix n lǧamaɛ  » llah akka, llah akka.. » din din yexsi kullec, tasusmi-nni tefruri, terreẓ am lemri mi ara yeɣli, truḥ akk d iceqfan. Lexwaṭer ttwacebblen, allaɣen rekkmen, lḥaṣul taddart teɣli ɣer lbir n yir targit.

Tameddit teɛjel-d s tikli akken ad tejɣem ass, seg-s tsess, tettsummu almi yekfa, tsumm-it almi d adif, din din itbeɛ-d yiḍ; yeɣli-d ɣef taddart am uqermud n wexxam aqdim mi ara d-yebbersex ɣer tegnit. Tid n yiḍ akked temḍella-s bdant.

Lḥal yebda ixesser, yerwi uɛebbuḍ-is; yettgurruɛ-d, d rrɛud, izehher waḍu, asigna din din iɣum igenni, ad tɣileḍ yella win i as-d-yerran taferṣadit i yigenni. Yezgen yiḍ, igenni yebra-d i lesrar-is, ageffur d ssxeḍ, aḍu izehheḍ akin akka. Tiregwa ukint-d, iɣeẓran neggzen-d, ula d akal yedduqqes! Ɣer berra yiwen ur d-yeffiɣ seg wat taddart. Di berra, Yal d ṣṣut yella, llaṭul izehheḍ waḍu yettreɛriɛ ad tɣileḍ yekkat agejdur, tiwwura n iɛecwan ttinẓint, tizemrin akked tsufa ad tɣileḍ selbent, tthuzzunt am win yettwazedɣen, ttneggizent kkatent akin akka acebbub-nnsent am temɣarin n zik mi ara ceṭṭḥent.

Lḥal iluɣ akkenni almi d lewhi n tefrara, tasusmi-nni tuɣal-d, ass yebda yettaki-d yefta am ujeǧǧig, tafat-is tbeggen-d taddart amek i as-yexdem lḥal; taddart texxerbubec, yesxenččew-itt lḥal n yiḍ-nni iɛeddan. Imezdaɣ n taddart mi bdan ad d-ttḍillin seg tewwura n yexxamen-nsen am tɣirdmawin mi ara d-ttḍillint seg ixejḍan-nnsent, walan taddart amek tuɣal, iberdan reglen, iḥemmalen zzuɣren-d ayen akk tḍegger taddart n ipuciḍen akked iɣerwisen, wwin-ten-id ɣer tlemmast n taddart bran-asen. At taddart mi walan akk d acu yeḍran, ayen yerẓen d wayen d-yeɣlin, fehmen belli ula d lḥal akked wakal d tjur, tizemrin ttikkin di taddart-nni, mačči d ayla-nsen kan, fehmen belli ula d akal yessusuf.

Zzin akin, ɣer wemḍiq-nni ideg tella lǧamaɛ, walan d amdun kan i yellan, lǧamaɛ tuffeg, yedda yid-s ccix n lǧamaɛ imi dinna i yezdeɣ. Qerben ad ẓren sani tuɣal, ufan belli yewwi-tt uḥemmal, izzuɣer-itt almi d aẓaɣar yebra-yas dinna, ma yella d ccix n lǧamaɛ ur tufin ara, wissen kan anda i as-yebra uḥemmal, yiwen ur inuda fell-as.

Mi walan liḥala-nni, mmesmuqalen ufan belli ɣas ma yella nutni ssusmen i ddel, akal ur yessusum ara, ma yella nutni wwten nneḥ akal ur yekkat ara nneḥ, ma yella nutni qqnen allen-nnsen akal ur iteqqen ara allen-is.

Irnaten Murad

rédaction
ADMINISTRATOR
PROFILE

Voir aussi

Latest Posts

Top Authors

Most Commented

Featured Videos