728 x 90

Anẓar, Ilibbiyen, Igrikkiyen d Ilatiniyen

Anẓar, Ilibbiyen, Igrikkiyen d Ilatiniyen

Imezwura-nneγ ttgen aṭas n wazal i tmeddurt d wayen sen-d-yezzin. Ttidiren s wayen sen-d-tefka tmurt, degmi ḥemlen akal, ttjuṛ, abeḥri yelhan, lmal, ifṛax, aman. Nnan-d zik-nni, imezwura-nneγ, am nutni am yegduden n wagerkal, ttamnen s Yiṭij. Ma tegrem tamawt, ad tafem mazal ar ass-a, llan wagad yettgalen s teḥbult n Yiṭij. Acimi ttamnen imezwura-nneγ s teḥbult n Yiṭij? Imezwura-nneγ ssnen d acu i d azal n Yiṭij. Zṛan d netta i d tudert. Zṛan lammer ad yexsi yiṭij, d ayen, ad tenger ddunit. Zran lammer ulac Iṭij, ur tettili ara tudert, ur tettili ara ddunit. Iṭij, neγ tiṭ n igenni (akka i s-yeqqar Ayskulus, amyaru agrikki) d netta, γer imezwura-nneγ, i d bab n tudert. Assagi, ula d imusnawen imeqranen di ddunit nnan-t-id, ammer ad yexsi Yiṭij, ad tenger ddunit. Ammer mačči d Iṭij, ur tettili ara tudert dagi di lqaεa. D netta i yettaken tudert i kulci, d netta i yettaken afud i kulci.

Imezwura-nneγ ttamnen s Yiṭij d Tziri, imi ẓran d akken sin-agi d nutni i d tiliwa n tafat. Tafat n yiṭij d ass. S yes-s i nettwali ccbaḥa n ddunit, tizegzewt n igenni d yilel, tizegzewt n lexlawi, iseγma n ijeğğigen d teslit n Wanẓar, d wayen akk yelhan i tmuγli. Tiziri, nettat d taknit n Yiṭij, s yes-s i nettwali deg yiḍ. D nettat i yeskanen abrid i yiminigen n yiḍ.

Ma nger tamawt γer yedles n Yigirikkiyen d Iṛumaniyen, ad anaf Iṭij d Tziri, uγalen γer-sen d Igennawen : Iṭij yuγal d Apullun neγ Fibbus, agennaw n tafat; ma d Tiziri, nettat, tuγal d Artimis neγ d Dyana, tgennawt n ṣṣyada. Akniwen-agi llan deg yiwet n tmesaεṛaqt s teqbaylit. Tamesεṛaqt-agi, atah wamek i tt-ttawin imezwura-nneγ : «Mara yekcem Sulas, Tawes ad d-teffeγ; mara tekcem Ṭawes, Sulas a d-yeffeγ». Iṭij d Tziri. Sulas d Ṭawes. Sulas d Iṭij s tlaṭinit, ma d Ṭawes d agennaw s tegrikkit. Iṭij d Tziri : Sulas d Ṭawes γer Leqbayel, Apullun d Aṛtimis γer Yegrikkiyen, Apullu d Dyana γer Ilaṭiniyen neγ Iṛumaniyen.

Imezwura-nneγ ttidiren d tegnac. Yal tagnect d acu d-tettawi. Ssnen d acu i d azal n wesru neγ n lweqt. Zṛan melmi ilaq ad megren, melmi ilaq ad meglen, melmi ilaq ad ẓẓun, melmi ilaq ad kerzen, melmi ilaq ad srewten. Ssnen ad steqsin aggur d yetran. D nutni i sen-d-yettmalen d acu ilaq a t-gen, melmi ilaq t-gen.

Deg yidles-nnsen, ad tafeḍ amdan d netta i yeṭṭfen talemmast n tmeddurt, d netta i γer d-icudd kulci. A s-tiniḍ ḍeffren abrid n Pṛutaguṛas, amusnaw agrikki, i d-yuran, 25 n leqṛun aya tura : «Ɣer wemdan, i tettwaktal yal taɣawsa». Γer imezwura-nneγ, am γer Yegrikkiyen, γef wemdan i teddewir teḥbult n Yiṭij. Γer imezwura-nneγ, yal amdan γur-es amutu-ines, izri-ines, tamacahutt-ines, tirga-ines. S wemdan i llant tγawsiwin. D netta i sen-yettakken isem. Degmi i d-yesnulfa tisquma. Yesnulfa-d leqwanen swayes yettidir.

Imezwura-nneγ, am nutni am Yegrikkiyen d Iṛumaniyen, γas akkenni ttamnen s igennawen, maca tteklen kan γef yiman-nnsen. Ma tegrem tamawt, γer wannect-agi, i sawḍent assagi tmura yenernan.

D amdan i d kulci. Γer-s i llant tsura n ddunit. Γef wayagi i ttnejmaεen imezwura-nneγ. Umnen d akken di tmeslayt i tella tifrat i yal tiyersi, i yal ugur. M ara qimmen i temsalt, ḥemmlen a tt-sqerdcen, a tt-ḍefren ḥacama d tilist. Ttaken aṭas azal i wawal. Im ara nejmaεen, yal amdan yezmer a d-yefk ṛṛay-is. Deg umeslay i tella tafat, i tella tifrat. Akken i t-yenna Arisṭutilis : «Amdan d lmal i ilan awal, d lmal apulitikki»

Di tejmeεt, yella lqanun. Lqanun-agi, yiwen mačči yezmer a t-iṛez. Imezwura-nneγ ur xelṭen ara lecγal n Igenni d wid n Lqaεa. Imezwura-nneγ ttidiren s leqwanen d-snulfan, nutni, mačči s leqwanen n Yigenni. Igenni, ttaran γer-s ayen ur nellin ara kan deg yefassen-nnsen. Igennawen n zik, nutni, si tama-nnsen, lhan d tudert-nnsen. Akken i s-yenna Pṛutaguṛas, umusnaw agrikki : «Ɣef Yegennawen, ulac d acu i zemreɣ a t-id-iniɣ, ur d-qarreɣ llan, ur d-qarreɣ ulac-iten».

Γer imezwura-nneγ, igennawen ur d-lhan ara d yemdanen, γur-sen lecγal-nnsen ula d nutni. Degmi wa ur tt-yettalas i wa. Imdanen γur-sen tilelli. Amdan yezmer ad yesuter ayen yebγa i Igennawen, maca ma yella ur s-ddin ara di lebγi, amdan-nni, yezmer ad ten-yenkeṛ. Ulac d acu ara yaggad, imi Igennawen n zik-nni ur tečḥen ara. Lhan kan d tudert-nnsen, dihinna iwsawen, deg igenni.

Igennawen n zik-nni ur d-fkin ara leqwanen swayess ara idiren yemdanen. Yal amdan yettidir s leqwanen-ines, netta d widak n tmurt-is. Asmi ara mmten, ulac anwa i ten-yettcaṛaεen. Ulac win ara sen-yinin ayγer tgam akka neγ akka. Degmi ulac win yegganen neγ win yettmettaten s iγilifen d nndamat. Imdanen n zik-nni, zṛan ad mmten, ad ṛuḥen ar tgelda n Waydes, agennaw n lmut, anda ara uγalen d lexyalat, maca iman-nnsen, neγ ṛuḥ-nnsen, ad yuγal d afeṛṭeṭṭu, ad yettezi yal iḍ s ixxamen-nnsen, ad yeddewir γef teftilt n lamba. Di tgelda n Waydes, neγ Yakuc, wid yemmuten, kifkif-iten akk. Ulac dinna Lğennet, ulac Times. Degmi imezwura-nneγ ur ttaysen ara ad mmten. Ḥemmlen teγzi n leεmmeṛ. Ḥemmlen ddunit. Hemmlen ad faṛsen zzhu, učči, tissit d tayri, imi zik-nni ulac d acu i yeḥeṛmen, ulac d acu i yeḥellen.

Imezwura-nneγ umnen s waṭas n yegennawen. Yal agennaw γef wacu i d-yezga. Wa γef lmut, wa γef waman, wa f yegenni, ta γef tayri, ta γef tẓegwa, ta γef tlallit, ta γef tmusni, wa γef yinig, wa γef ccbaḥa, wa γef tissit d zzhu, ta γef lexlawi… Igennawen-agi ttidiren deg genni, deg Iter. Tikwal tikwal, ttṣubbun-d ar lqaεa, maca m ara d- ṣubben γer yemdanen, ttbeddilen tafekka. Tettin d imdanen. Degmi, zik-nni, imezwura-nneγ, snubguten aṭas s ubeṛṛani, qarren-as ammer ahat d agennaw i γ-d-ibedden γef tebburt. Degmi i s-ttuγalen d laεnaya. Tella akka ula γer Yegrikkiyen. M ara d-yass γer-sen ubeṛṛani, a s-fken zwar ad yečč, ad isew, ad igen, swamek imiren ara t-steqsin γef yisem-is d wansi d-yekka.

Igennawen n zik-nni, tikwal dellun-d γef yemdanen. Win yesunebgen yis-sen, ibedd γer-sen, winna ulac akk d acu ara yaggad si tama-nnsen; ma d win ten-yerran γef tebburt, winna ur s-tteffγent ara i yiri. Mektit-d agellid n Tabest, asmi yerra ɣef tebburt n tgelda-ines Dyuniẓus, agennaw n tissit. Syen sakkin gezrent-t d ticriḥin yemma-s d yestma-s. Imi Igennawen n zik-nni weεṛen i m ara rfun. Degmi i sen-zzelun yemdanen, i sen-ttgen timeγriwin, ha d imensi n iwejiben, ha d imensi n yennayer, ha d timecreṭ, ha d tislit n Wanẓar, ha d amagger n tefsut…

Imezwura-nneγ ḥemmlen tamusni. Yal tameddit, mi ččan imensi, ad zzin i teṛbut n tmusni akken a d-awin timucuha d tmesaεṛaq. Taṛbut n tmusni d nettat i d lakkul n zik-nni. Dinna i lemden iggurdan ddunit. Dinna i ten-sγarayen yemγaren d temγarin. Taṛbut n tmusni tesmektay-aɣ-id asunfsyu n Yegrekkiyen : imi Igrikkiyen m ara mlillen akken ad ččen neγ ad swen, ttmeslayen. Ttmeslayen γef ddunit, γef Igennawen, γef tmurt, γef leqwanen-is…

Imezwura-nneγ, wid-nni iwumi qarren Yegrikkiyen «Ilibbiyen», neγ ma tram igduden n waman, ttamnen s waman. Aman, am tafat n yiṭij, ammer ad negren, ad tenger yid-sen ddunit. Iṭij d waman d nutni i d tameddurt. Degmi i sbedden ageniw, neγ aεessas, i yal tala, i yal amdun, i yal asif… Imezwura-nneγ ṭafaren aman. Anda tufiḍ tala, ad tafeḍ taddart; anda tufiḍ asif, ad tafeḍ tamdint. Am temdint n Ṛuma, γer rrif n isaffen i ibnant akk temdinin timeqranin n ddunit.

Imezwura-nneγ, imi ara yilli uγurar, ttgen Anẓar. Yal m ara d-yeγli uγurar, yal m ara sen-yekkes Wanẓar, ugennaw n ugeffur, aman, ad fernen tameṭṭut yelhan di taddart, t-in werğin nezwiğ, ad s-tt-awin d tislit. M ara d-yaweḍ diγen lawan akken ad feṛqen tiregwa, kifkif, ad kkren ad sgen timecreṭ, ad s-zlun azger.

Anẓar d agennaw n waman, d netta i d bab n usigna d ugeffur. D netta i yesswayen igran, i yessfayen tiliwa d iɣeẓran. D netta i d bab n tudert.

Amutu/le mythe

Yiwen wass, Anẓar iwala yiwet n teqcict teccucuf εeryan deg wasif. Asif-nni, aman-is ttiṛiqen am lfeṭṭa. Akken kan i tt-iwala, teγli-yas γer tiṭ. Am tkurt n tmes, iṣubb-ed deg igenni γur-es, akken ad tt-yawi. Tugi. Degmi akkenni tugi ad teddu yid-es, dγa Anẓar yerfa. Iga akka yekkes-asen aman i tmurt n teqcict-nni. Dγa kullec yeqqur : isafen, iγezran, tiliwa, imdunen, igran, urtan…

Taqcict-nni, imi twala akkenni, tugad ad tenger tmurt-is, dγa tga akka tsawel-as. Tsawel-as yuγal yewwi-tt γer igenni, γer wanda zedγen Igennawen. Syen sakkin, yerra-d aman i tmurt n teqcict-nni. Dγa deg imiren, teqqim-ed akkenni d tassirit. Yal m’ara d-yeγli uγurar γef tmurt, ad kkren imezdaγ n tmurt-nni, ad as-awin tislit i Wanẓar, syen sakkin ad sen-d-yerr aman.

Dagi diγen, ma yella nger tamawt γer yidles agrikki, ad anaf γer-s sin imutuyen am wagi n Wanzaṛ. Amezwaru, d amutu n Mimuniya, yelli-s n Danayuṣagellid n Waṛgus, akkd d Puẓaydun, agennaw n yilel neγ n lebḥeṛ. Amutu-yagi yeḍra di tmurt n Waṛgus, di tmurt n Tegrikt. Asmi tettnaγ tgennawt Hira, tmeṭṭut n Dzus, d Ugennaw Puẓaydun γef tmurt-agi, Puẓaydun yerfa, dγa ikkes-asen aman i Wat Waṛgus. Ur sen-ten-id-yerri yara, almi d asmi s-fkan d asfel tislit Mimunya, yell-is n n ugellid Danayuṣ.

Amutu wis-sin d win n Piṛsifunya, yelli-s n Dzus, bab igenwan, akkd d Dimitir, tgennawt n teγrest. Piṛsifunya, yiwen wass, teffeγ ad d-tekkes ifsan deg urti, iwala-tt Waydes, agennaw n Tmes, dγa iwwi-tt γer tgelda-ines, i d-yezgan seddaw n tmurt. Dimitir, teffeγ, tebda anadi γef yelli-s. 9 wussan d 9 wuḍan, ulac, ur tt-tufi-yara. Tuγal teḥzen d ayen kan. Temheṛ lexlawi, dγa kullec iqqur : igran, tiliwa, iγezṛan… Maca imi tettnadi akken γef yelli-s, Dimitir, iwwi-tt webrid γer Yilyusis, anda i isunebeg yes-s ugellid n tmurt-nni. Teqqim dinna γer-sen kra n wussan, tuγal, asmi tekker ad tṛuḥ, Dimitir tesken i imezdaγ n tmurt-nni amek ara ẓẓun, amek ara megren, amek ara srewten. Seg imiren, At Yilyusis, akken ara d-taweḍ tefsut, ad kkren ad tt-magren s tmeγra n ijeğğigen, tameγra iwumi qqaren : Udrigen n Yilyusis.

Dimitir, tkemmel abrid-is, tettnadi γef yelli-s. Tettu tamurt, yeṭṭef-itt uγurar. Akal yebda yettceqiq, imdanen d lmal bdan ttmettaten… Qrib tengir ddunit. Yuγal Hilyuṣ, neγ Yiṭij, akken yeẓra akken, yekker yenna-yas i Dimitir d akken d Aydes, agennaw n lmut, i iwwin yelli-s γer tgelda-ines. Dimitir, imi teẓra akken, tekker tesaweḍ taluft γer Dzus. Dzus, agellid n igennawen, isemlal-d wid i terza temsalt. Yenna-yas i Waydes « Issefk-ak ad terreḍ Piṛsifunya i yemma-s Dimitir. Aydes inna-yas « Ur a s-tt-rraγ ara, imi Piṛsifunya tečča sebεa iεeqqayen n ṛṛeman deg wexxam-iw. » – Akken i s-d-yenna akken, dγa Dzus igezm-itt, yenna-yas : « Imi akka, deg wass-a d asawen Piṛsifunya ad tettili azgen useggas γer wergaz-is, azgen useggas γer yemma-s. » – Dγa deg imiren Piṛsifunya tesεedday lexṛif d ccetwa, tignac n leḥzen, γer wergaz-is; ma d tafsut d unebdu, tignac n zzhu, γer yemma-s.

Maca imutuyen-agi uran-ten Yegrikkiyen, 26 n leqrun-aya tura. Γef ayagi i mazal-iten, ulac win i izemren ad ten-yekkes neγ ad sen-ibeddel. Γer Ilibbiyen, ur ten-urin ara. Γef wayagi assagi i γ-iṛuḥ umatu n Wanẓar. Yeqqim-ed deg-s ciṭuḥ kan, winna yura wemyaru afṛansawi Genevois, lqern-aya. Amutu-yagi yewwi-t-id deg At Ziki. Maca win s-t-id-yulsan, ur s-t-id-yewwi yara akken yella. Imi amutu-yagi, yal tallit ad tafeḍ beddlen-as neγ εegben-tt. Imi akken kan yebda, yenna-yas : yella yiwen zik-nni isem-is Anzaṛ. Dacu-t ? Ur d-yenna. Yella yiwen zik-nni, yebγa ad d-yini d akken, tura, win yellan zik-nni ulac-it. Acimi i ulac-it? Ur d-yenna ara. Anda yerra ? Anda d-yeggura ? Dacu i yuγal ? Ur d-yenna ara. Syen akkin, yuγal yenna-k d agellid n waman. Agellid neγ ṛebbi. Yal tamurt amek i iqqaren. Maca ma yella Anẓar d ṛebbi, ur ilaq ara a d-yini d akken yella kan zik-nni… Ma yella Anẓar d ṛebbi, iban kan akka mazal-it yella. Mazal-it yella imi d alebdi, yerna diγen mazal ar ass-a, llant tudrin n Leqbayel i ixedmen Anẓar mara yilli uγurar. Maca akka i tḍeṛṛu d umezruy, d imutuyen d tmucuha ur nurri-yara di lawan-nnsen. Win d-iεeddan ad sen-ibeddel, ad yekkes ayen ur yebγa ara ad yilli, ayen t-iḍuren, ad tt-yerr d tamεayt neγ d timeseεṛaqt, am tidak-nni γ-d-ttawin γef lḥiwan.

Llan maḍi wid d-yettawin amutu-yagi, qqaren : asmi theddeṛ ddunit, yella yiwen qqaren-as Anẓar; neγ asmi heddṛen lḥiwan, yella yiwen qqaren-as Anẓar. Melmi ? Yiwen ur yeẓri. Dacu-t Wanẓar ? Yiwen ur yeẓri, ma d agennaw neγ d lḥiwan. Atah wamek i tḍerru d Igennawen n yegduden yeγlin. Semmi-yasen akken i k-yehwa, ulac dacu ara taggadeḍ, imi imawlan-nsen, widak-nni iwumi ilaq ad ḥarben fell-asen, ḥeqren-ten, ttun-ten…

Igrikkiyen d Iṛumaniyen, nutni, uran kullec. Yal agennaw ad tafeḍ yeqqen γer umezruy-nnsen, anta tamdint i yesdaray, isem-is umezwaru-nsen yebnan tamdint-nni. Atina tezga-d γef temdint n Atinay, Apullun γef Dilfi, Hiṛa γef Waṛgus, Dzus γef Ulampiyuṣ… Yal amutu, ad k-d-inin anda yeḍra, melmi. Yal tamdint, γur-es agennaw, γur-es anwa i s-igan adγaγ n llsas. Meγres, agennaw alaṭini n lgirra, d ababat n wakniwen Ṛimus d Ṛumulus. Aken kan temmut yemmat-sen, yuzn-asen-d Meγres tuccent, tewwi-ten γer lγaṛ-is, tesuṭeḍ-iten am akken d arraw-is. Asmi muqqrit, d nutni i yekkren ad bnun tamdint n Ṛuma. Maca ur msefhamen ara γef amkan, yiwen yebγa ad tt-yebnu γef tiγelt, wayeḍ yebγa ad tt-yebnu γef tiγilt-nniḍen. Rran-tt γef Igennawen. Maca igennawen uznen-asen-d lferg n yefṛax, di 12 yid-sen, ufgen tama tayefust, degmi i ilaq i Iṛumaniyen ad bnun Ṛuma γef tiγilt-nni yefren Ṛumulus. Ṛumulus yerfed tayuga, iga aḍref d llsas, iḥudd yes-s tamdint ara yebnu. Imi ifuk tayerza n weḍref-nni, yenna-yasen i Iṛumaniyen, win ara iεefsen aḍref-agi, yenγa-t lqanun. Maca gma-s Rimus ur yefṛiḥ ara. Yekker yeεfes aḍref-nni, dγa yenγa-t Rumulus. Atah tura γef wacu i zellun i llsas Iṛumaniyen. I Leqbayel γef wacu izellun i llsas ? Melmi i bdan zellun i llsas ? Melmi i bdan ttakken lmal d asfel akken ur ttemyezlan ara watmaten mara γzen llsas ? Maca Rumulus, γas akkenni yenγa gma-s, yesbedd tamdint n Ṛuma, tamdint n lebda, tinna i igelden γef ddunit.

Amutu n Ṛuma

Amutu-yagi, d wagi i sγarayen ar ass-a Iṭelyaniyen mara seγren amezruy n temdint n Ṛuma. Melmi i d-tlul temdint-nsen, anwa i tt-yebnan, anwa i yesduklen 7 tudrin d-yezgan γef 7 tγaltin n Ṛuma. I γer Leqbayel, dacu i d-yeqqimen di tfunast n igujilen ? Anta tamurt i deg teḍṛa ? I umutu n Wanẓar, dacu i d-yeqqimen deg-s ? Anta tamdint i deg yeḍṛa ? Melmi ? Isem-is teqcict-nni yewwi yid-es ? Dacu-tt ? D tageldunt ? D tagennawt ? D taṛuḥanit ? Amek tella tmurt-nni i deg yeḍra umutu-yagi ? Anwa i d agellid-ines ? Anwa i s-yefkan taqcict-nni i Wanẓar ? D acu i yeḍṛan di tmurt-nni ger wasmi sen-yekkes Wanẓar aman almi d asmi sen-ten-id-yerra ?

Degmi i wen-d-nenna d akken imutuyen n Leqbayel, beddlen-asen iswi, kksen-asen amezruy-nsen. S tidett, Iṭelyaniyen ur uminen ara d akken Rimus d Rumulus d tuccent i ten-id-yesekren, maca d amutu-nsen, ttzuxun yes-s, ulac anda ur tt-tettafeḍ ara. Tamurt n Tegrikt kifkif, tagennawt Atina d nettat i yesdarayen tamdint n Atinay ar ass-a. Afṛux-ines d tagdiṭ. Ass-a, tagdiṭ tuγal d nettat i d udem n temdint-agi. Tuccent tuγal d nettat i d udem n temdint n Ṛuma. I γer Leqbayel, dacu i tuγal tfunast n igujilen ? Tinna akken i sen-yefkan i Leqbayel ṭṭḍen asmi temmut yemmat-sen ?

Imutuyen-agi, nezmer a tent-naf di yal tamurt n Wagrakal. Γer Yegrikkiyen, γer Yilaṭiniyen, akkd γer yegduden n Teffrikt ugaffa, anda llan Ilibbiyen.

Maca ma nezzi-d γer temsalt-nni n waman, ad anaf d akken di tmura n Wagrakal, deg wakken xuṣṣen waman, igduden-nsent ttgen aṭas n wazal i Yegennawen d tgennawin n Waman : Puẓaydun di tmurt n Tegrikkt, Neftun di Ṛuma akkd d Wanẓar di tmurt n Ilibbiyen.

Aman

Di tmura-yagi, ttwallin akk aman s yiwet n tmuγli. Yal tala ad tafeḍ γur-es agennaw i tt-isdarayen. Tala n Waṛgus, ffγen deg-s waman imi yiwwet Puẓaydun tazart-ines deg yefri. Di Dilfi, tala n Kastalia tella tezdeγ deg-s tlafsa, yugin a d-tefk aman i imezdaγ n Dilfi. Teğğa-ten i fad, armi d asmi i tt-inγa ugennaw Apullun. Mazal ar ass-a di tmurt n Leqbayel, ttalsen-d imutuyen am wigi. Maca tineggura-yagi, ttun-tent yemdanen neγ bedlen-asent. Rran deg mukan n Yegennawen-agi ṣṣelaḥ d lawliya. Aṭas i sen-yeqqaren i Leqbayel d akken « Ur tesεim ara tala dagini almi d asmi d iεedda jeddi, iwwet taεekkazt deg wakal, dγa fγen-d waman. » – Qqaren-asen diγen : « Zik-nni, di tala-yagi-nwen, tella tlafsa. Ur awen-d-tefki yara aman armi d asmi d-iεedda jeddi yenγa talafsa-nni. » – Maca akka i tḍeṛṛu di ddunit meṛṛa, agdud m’ara yeγḍel wayeḍ, ad as-yaker kullec, ula d imutuyen-ines d timucuha-ines, ad sen-ibeddel, ad tent-yerr d ayla-ines. Degmi Timecṛeṭ tuγal d taεacuṛt, Igennawen n zik uγalen rran-ten d ṣṣelaḥ d lawliya.

Akken i teḍṛa d Wanẓar, asmi γlin imawlan-is, yerwel ula d netta yid-sen γer yidurar. Yuγal ula d netta am Leqbayel, iẓerreb iman-is deg udrar, ittrağğu… ammer ahat yiwwas, ad t-id-mektin warraw-is.

Ddula n Lezzayer, degmi ur tesṭṭaref ara s Leqbayel, s tmeslayt-nnsen, s nekkwa-nnsen, ur tesṭṭaref ara s Wenẓar. Γur-sen d lbidεa neγ d akellex. Ass-a, m’ara yili uγurar, ddula n Lzayyer; tessawal-d γer teẓẓalit, akken ad d-yeγli ugeffur.

Maca γas akkenni, mazal ar ass-a, llant tudrin anda ttgen tameγra i Wenẓar m’ara yilli uγurar. Tameγra-yagi xeddment-tt tlawin d igurdan. Xeddmen-tt ass deg i ulac irgazen di taddart. Ass n tmeγra-yagi, tilawin n taddart, ad kkrent ṣṣbeḥ zik, ad fernent tislit, tin werğin nezwiğ, ad as-cebbḥent, syen sakkin a tt-bibbent tlawin, ad as-tt-awint i Wanẓar. Imi ara ffγent deg wexxam, ad ḥebbsent γef yemnaṛen n yexxamen, anda d-tteffγent tlawin d igurdan akken ad ddun yid-sent. Maca yal win ara d-iffγen deg wexxam, ad d-yeglu s weεwin : udi, ibawen, tazart, zzit, acedluḥ, seksu… Syen sakkin, m’ara awḍen s amkan, ad sersent tlawin-nni tislit, ad sewwent, ad ččen. M’ara kfun učči, ad kkren imir ad s-ḍewren i teslit-nni, ad tt-rren di tlemmast, nutni ad s-cennun, nettat ad sen-d-tettara s isefra. Maca m ara d-taf iman-is di tlemmast, ad teṭṭef aγenja, ad terfed sennig uqerruy-is, ad t-sendi s yigenni. Γef wakken d ḥekkun, nnan-d zik zik-nni, uqbel a d-awḍen at Yiwen, nnan-d d akken Ilibbiyen, mara fernen tislit, ttawin-as-tt i Wanzaṛ εeryan. Maca tineggura-yagi, ugin-asen at Yiwen, qqaren-asen : « D leḥṛam! ».

 Amek ifarqen aksum ?

Tameγra n Wanẓar tettili-d akkagi deg wedrar. Maca anda yella lebḥeṛ, dinna qqaren-as Awessu. Mara d-yaweḍ waggur n γucṭ, ad kkrent tlawin tafrara, ad ṛuḥent ad cfent di lebḥeṛ εeryan, akken agennaw n yilel, ad sen-yefk ageffur, swayes ara kkren yigran, rnu diγen ad ftin iselman deg waman.

Itnayen, neγ imezdaγ n temdint Atinay, ula d nutni, am Ilibbiyen i ixeddmen zik-nni. Ula d nutni di tmeγra n Panatinay, d tilawin i yezeggiren zdat yergazen ad awint ayla-ines i tgennawt Atina neγ Guraya, imi d nettat i isdarayen tamdint n Atinay. Ass-nni n tmeγra-yagi, ad ffγent tlawin ṣṣbeḥ zik, ad ccebḥent, ad awint γef iqerra-nsent tiqcwalin n uzegza d lfakiya. Mi wwḍent s agni, ad xedment dinna tameγra, ad sewwent, ad ččent, ad sswent. Ma d irgazen, am tmurt n Leqbayel, nutni ttilin kan anda tella tmezla. Igrikkiyen, m’ara zlun azger, ccewin iγsan d tasemt-ines, akken ad awḍen iraggun ar igenni, γer Igennawen. Ma d nutni, irgazen n Atinay, ad ččen aksum. Ad ččen ayen ara ččen, ayen d-yegguran, ad t-ferqen gar-asen d tixxamin, akken i ixeddmen Leqbayel m ara zzlun timecṛeṭ.

Iraggun n tasemt d yeγsan, d wagi iwumi qqaren Yegrikkiyen amur n Yegennawen. Tella ula di tmurt Leqbayel. Aqbayli, m’ara d-ikkes zik-nni tayedrett tazegzawt deg Yiger, ad yečč deg-s kullec, ḥaca taεqqayt taneggarut. Tinna yettağa-tt, yettḍeggiṛ-itt s iger-nni i deg tt-id-ikkes akken. Yettara-tt i yiger. Taεqqayt-nni, qqaren-as : amur n Yiger.

Di tmecreṭ, Leqbayel feṛqen aksum, am Yegrikkiyen. Maca ansi i d-yebda Faṛuq-agi n weksum. Igrikkiyen yuran γef wanect-agi, nnan-d yebda-d zik-nni, asmi zzlan yergazen imezwura azger i Dzus, bab n igenwan, agellid n igennawen. Imi zzlan azger-nni, uzan-t, gezmen-t, yekker-d yiwen deg-sen, isem-is Prumittus, iga snat n tirrac. Yiwet n tirrect n yeγsan, iγum-itt s tasemt; ma d tirrect nniḍen, d aksum iγum-itt s uḥedduf-nni n wezger d icufaḍ, syen sakkin, yesefren Dzus. Dzus, imi iwala tirrac-nni, yerfed tinna n tesamt. Imi yedla sakkin γer ddaw-as, yuffa ḥaca iγsan. D tirrect-nni i serγayen deg imiren Yegrikkiyen i Igennawen.

Timecreṭ, anisi d-yekka wawal-agi. Awal-agi yekka-d di Ccreḍ, senγel idammen. Γef wayagi i izellun imezwura-nneγ, akken ad sneγlen idammen n wezger, azger ttakken d asfel fell-asen i Igennawen akken ad ten-nεiwen, akken ad illin waman, akkin ad ḥlun ma yella uḍnen, akken ad rebḥen lgirra, akken ad taf iman-is tmurt… Igennawen, nutni si tama-nnsen, ḥemmlen ad sriḥen iraggun, degmi ittεawanen igduden i sen-izellun.

Di tmurt n Tegrikt, agennaw akk i iḥemmlen timezla d Apullun. Agennaw-agi, s kra n wanda s-bnan axxam Yegrikkiyen, ad tafeḍ dinna tugar tmezla. Di lawan-nni, yal mara d-taweḍ tmegra, d lqanun, yal Agrikki ad yawi γer wades, neγ γer wexxam, n Apullun tis-εecṛa deg wayen s-d-terra tmurt-is. D leγrama iwumi qqaren Yegrikkiyen La dime.Agennaw Apullun, deg wakken teqwa tmezzla deg uxxam-is; sawalen-as Yegrikkiyen Ajenwi. Ajenwi, awal-agi yekka-d deg wawal Agenwi, winna yellan deg igenni. Ajenwi am Ugenwi, am tefruyt, d netta kan i tent-iferrun, i tt-igezzmen. Degmi i d-nettmagar awal-agi s waṭṭas di tmeslayt taqbaylit : igezm-d limin, gezmen awal, ggezmen ṛṛay, igezm-as-d abrid… Ajenwi, d netta i d lqanun. D netta i igezzmen aksum, i t-ifeṛqen, akken ad d-yesmekti i warraw n taddart d warraw n tmurt teqḍeε-ines, ad ten-id-yesmekti d akken d netta i d agennaw-nsen, d netta i iεussen γef leqwanen, γef lḥeṛma n yal yiwen, γef tdukli-nsen…

Deg Wades, neγ deg wexxam, n Apullun, di Dilfi, tella yiwet n tmeṭṭut dinna, ttṛuḥun γer-s Yegrikkiyen akken ad tt-d-zzuṛen. Wa yettzuṛu-tt akken ad iẓer ma yella ad d-yesεu dderya: wa yebγa ad iẓer ma yella ad yeg inig yelhan; wa yebγa ad iẓer anta ara yaγ… Yal yiwen kan γer wacu i ittṛuḥḥu, maca imezuyaṛ-agi ur tettun ara, ttawin yid-sen ayla n ugennaw : wa d idrimen, wa d ikerri, wa d aεejmi, wa d tixsi, wa d awren… Annect-agi yella ula di tmurt n Leqbayel. D wid yettkacafen, yeẓran dacu ara yeḍrun azekka, d wigad-nni iwumi qqaren at Yiwen, asmi γlin Yegrikkiyen d Iṛumaniyen, idderwicen d tderwiccin. Tikwal diγen Igrikkiyen ttṛuḥun γer tasaft n Dzus, steqsayen-tt. Dzus netta yettaray-asen-d s waḍu. Ma yella afriwen n tasaft-nni mbawlen, d « ih », ma yella ur mbawlen ara, d « Xaṭi. » – Am tala n Wedris, deg Ilulen Umalu, mara s-tiniḍ kra, ma teslewlew, ad d-yeḍru wayen tesarameḍ; m ur teslewlew ara, ur iḍerru-yara.

Igrikkiyen d Iṛumaniyen n zik, am Leqbayel, teqnen i Igennawen-nnsen. Zellun-asen, ttakken-asen tineqlin, ttawin-asen γer yexxamen-nsen awren, zzit, lmal, akken ad εetqen taṛwiḥt n win yuḍnen. Igrikkiyen, ula d nutni, zellun iyuẓaḍ i Asklupyuṣ, agennaw n tezmert d tujya; tezzin-ten ɣef iqerray n yimuḍan.

Acimi d tilawin ?

Tameγra n Wanẓar d tameγra n tlawin. Neẓra d akken tislit i s-ttawint tlawin i Wanẓar d tilemẓit, werğin tezwiğ. Tilawin-nni, im ara fkent tislit i Wanẓar, syen sakkin, d nuba n teqcicin n taddart, tidak-nni mazal nezwiğ, ad kkrent, ad urarent zerzari neγ takurt. Ad γzent lγaṛ deg lqaεa, ad refdent iεewzen, ad sersent takkurt n wexnac γer lqaεa, ad bdunt sakkin ttdeggirent-tt akken ad tt-skecment deg lγaṛ-nni.

Ansi d-yekka wurar-agi ? Asmi d-yerza umusnaw agrikki Hiṛuduttus γer tmurt n Libbiya, 23 n leqrun-aya tura, yules-d d akken tullas n tmurt-agi turraren s iεewzen. Urar iwumi qarrent urar n lgirra. Urar-agi yeqqim-d deg wesmi tenγa tgennawt Atina tamdakkelt-is Pallas, imi llant tturarent urar n lgirra. Hiṛuduttus yenna d akken tagennawt Atina, am Puẓaydun, wwin-tt Yegrikkiyen di Libbiya. Yenna d akken ula d ddil-nni i ttlusunt Tegrikkiyen d Tṛumaniyin, wwin-t Yegrikken di tmurt n Libbiya.

Tagennawt Atina : tagennawt n tmusni, n lgirra d talwit. D nettat i yessdarayen tamdint n Atinay, di tmurt n Tegrikt. Tagennawt-agi, ssawalen-as diγen Yegrikkiyen Guraya, imi d nettat diγen i d-yezgan γef l’Agora tagrikkit. I yemma Guraya ? Anta-tt ?

Tagennawt Atina, d nettat i yefkan iman neγ ṛṛuḥ i wemdan amezwaru, winna akkenni i yebna Prumittus deg wakal. Terra-yas-t di tfekka-ines am ufeṛṭeṭṭu. Necfa zik-nni, di tmurt n Leqbayel, m ara itezzi deg yiḍ uferṭeṭu γef lamba, qqaren-aγ-d imawlan-nneγ, d ṛṛuḥ n win yemmuten i d-yerzan akken ad d-yestesqsi fell-aγ.

Afṛux n tgennawt Atina d tagdiṭ. Tagdiṭ yettεiccin, yettṣeggiden, yettwalin deg yiḍ. D tagdiṭ i tettanez Atina ticki tra ad tessiweḍ lexbaṛ i igennawen nniḍen neγ i yemdanen. Tagdiṭ, tinna iwumi qqaren tagara at Yiwen imiεṛuf : win yessnen, win yettwalin deg yiḍ. Tinna i γef d-qarren tettawi-d yir lexbaṛ, tessawal i lmut deg yiḍ m ara tettγenni. Tagdiṭ, ass-agi, di tmura yenernan tuγal d nettat i d udem n tmusni.

Atina, nnan-d Imusnawen igrikkiyen, d akken wwin-tt-id Yegrikkiyen di Libbiya. Atina d nettat i sen-yefkan tazemmurt i imezdaγ n Atinay ? Tazemmurt, ttejṛa n tgennawt Atina, ttejṛa n tmurt n Tegrikt, n tmurt n Ṭelyan, n tmurt n Leqbayel.

Igrikkiyen, Iṛumaniyen d Leqbayel d arraw n tzemmurt, neγ llan diγ wagad yeqqaren d arraw n teslent d tasaft. Tasaft d ttejṛa n Dzus, agellid yullafen, tinna d-ijebden ssiεqa. Dzus iwumi qqaren Iṛumaniyen Jupiter, bab n igenwan; iwumi qqaren Leqbayel Ubdir. Ubdir i swayes mazal ttgallent temγarin di tmurt n Leqbayel, swayes mazal ttẓallant, swayes i mazal deεunt : Ubdir ar akka ! Fkiγ-k i Wubdir ! A winna yeṭṭfen igenwan mebla snasel !

Dzus d baba-s n Atina. Atina iwumi qqaren Ilaṭiniyen Minerva.

Atina werğin tezwiğ. Am Aṛtimis, tgennawt n tẓgwa, d Histya, tgennawt n yexxamen. Aṛtimis, nettat, tesddaray tilawin ur nezwiğ ara. Ma d Histiya, tgennawt n wexxam, nettat, tezga-d γef tmes n lkanun, tettεassa-tt akken ur txetti yara. Aṛtimis qqaren-as Ilaṭiniyen Dyana, ma d Histya qqaren-as Westa.

Maca γer Yegrikkiyen d Iṛumaniyen, am Leqbayel, γur-sen Igennawen d tgennawin yettεasan ixxamen, tiliwa, urtan, lexlawi, isafen… Akken di tmurt n Leqbayel, tigennawin yettεasan ixammen qqaren-sent tiwkilin; igennawen yettεasan tiliwa d lexlawi, qqaren-asen iεessasen. Maca Tiṛuḥaniyin, tilawin-nni yettilin di tmurt n Leqbayel, tidak-nni i izedγen di tẓegwa, di lexlawi, deg isafen, tidak-nni qqaren-asent Yegrikkiyen Nunfat.

 Anzar d tyatr

Maca tilawin m ara s-awwint tislit i Wanẓar, im ara s-kksent iceṭṭiḍen, ad s-zzint, ad s-cennunt, ma yella d nettat, ad sent-id-tettara s isefra. Annect-agi yella di tmurt n Tegrikt zik-nni, akkagi dγa i d-tllul tṛajiddit neγ umezgun agrikki. Tazwara, yella yiwen wemyurar, ad as-zzin yemyurar nniḍen, nutni ad s-cennun, netta ad sen-d-yettara s lehduṛ. Urar-agi yeqqim-ed di tmurt n Leqbayel, mazal-t ar ass-a, di tmacahutt-nni n Uεaṛus bu beṛnus. Ass n wurar, ad kkrent tlawin ad selsent abeṛnus i tmeṭṭut, ad s-γument aqerru-s s uqelmun-nni n ubeṛnus, syen sakkin, ad teqqim γef tgecrar. Tilawin n taddart ad s-zzint, ad s-cennunt :

Taqsiṭ n uεaṛus

Aεaṛus a bu beṛnus,

Kker a ttxedmeḍ ?

Ur jmireγ ! ur jmireγ !

 Aεaṛus a bu beṛnus,

Kker a ttqedceḍ ?

Ur jmireγ ! ur jmireγ !

 Aεaṛus a bu beṛnus,

Kker a tteččeḍ ?

 Ur jmireγ ! ur jmireγ !

Aεaṛus a bu beṛnus,

Kker a ttzewğeḍ ?

Akken ara isel i wawal-agi, dγa aεaṛus-nni ad yekker s ibeddi, ad yebdu iceṭṭeḥ, icennu :

 Zemreγ ! Zemreγ !

Zemreγ ! Zemreγ !

Aεaṛus deg urar-agi d isli, winna iwumi qqaren Yegrikkiyen Iṛus, agennaw n tayri. Dγa dinna i d-yekka wawal-nni n tayri, i d-yekkan netta deg wawal rri : bγu.

Iṛus n Yegrikkiyen γur-es aγafa d inecaben. Mara iwwet amdan s unecab γer wul, dγa ad tekcem tawla n tayri.

Iṛus, γer Yegrikkiyen, d mmi-s n Afṛidutti, tgennawt n tayri. Iṛus, ssawalen-as Ilaṭiniyen Kupidun; ma d Afṛuditti, ssawalen-as Winus; deg yisem-agi i d-yekka yisem-nni n leqbayel Wnisa.

Maca di tmeγra n Wanẓar, am tmeγriwin ttgen Leqbayel i Igennawen-nsen, yella wayen ixuṣen. Txuṣ tissit. Imi di talwit-nni n Igennawen agerkalen, ulac tameγra i deg ulac tissit. Zik-nni, di tmura-yagi, n wagrakal ttgen tissit s waman d tamment, tinna iwumi qqaren Iṛumaniyen Hydroméli. Xeṭlen aman d tamment, ttağan-tent ad xumṛen, syen akken tessen-t. Tissit-agi mazal-itt ar ass-a di tmura yenernan. Γer Yegrikkiyen, agennaw d-yezgan γef tissit, ccḍeḥ, amezgun d tmeγriwin, d agennaw n tissit d tejnant, winna iwumi qqaren Dyuniẓus; Ilaṭiniyen, nutni, ssawalen-as Bakkus neγ Liber. Agennaw-agi yezga deg iberdan, teddunt yid-es tlawin, ttawint deg ifassen-nsent iεewzen. Tilawin-agi qqaren-asent Timenadin neγ tibakucin. Yal tamurt i γef ara εeddin, Dyuniẓus d tmenadin-agi, ma yella win-sen-d-yezewren, yegguma ad ten yeğğ ad kecmen γer tmurt-is, ad kkrent tmenadin-nni ad tekkaten-t s iεewzen ḥacama yemmut.

I telmeẓyin-nni yetturaren takurt di umutu-nni n Wanẓar, tidak-nni yeddeggiren takurt-nni n wexnac γer daxel n lγar, ammer ahat d timenadin-nni i iteddun d Dyuniẓus ?

Degmi ass-a, γef wayen γ-d-yewwḍen di umutu n Wanẓar, ur nezmir ara ad d-nini Anwa i d Anẓar ? Ma d Dzus-Ubdir, bab n igenwan neγ d Puẓaydun-Neftun, agennaw n yilel ? I teqcict-nni yewwi, anta-tt ? D tageldunt ? D taṛuḥanit ? D tagennawt ? Neγ ahat d Iris n Yegrikkiyen, tislit n Wanẓar, tinna d-itefγen deg igenni s iseγma lefwaḍi, mara teswawi lehwa ? Amutu n Wanẓar d-nufa ulac dacu i d-yenna. Kksen-as amezruy-ines. Rran-t d tamacahutt. Yeqqar-d kan d taqcict tecbeḥ aṭas. Tecbeḥ aṭas almi i tt-yebγa Wanẓar.

Leqbayel ttwallin Anẓar akken ttwallin Yegrikkiyen d Iṛumaniyen Igennawen-nsen : γur-es taεeṣabt γef anyir, imi d netta i d agellid ameqqran, d netta i d bab n ddunit.

Tagara

Anẓar d agennaw, umnen yes-s Leqbayel. Ttmektayen-t-id ar ass-a. Yal m ara yilli uγurar, ad s-gen tameγra. Isem-is icudd γer waman. Aman i s-iswayen urtan, igran d lexlawi. Imezwura-nneγ umnen yes-s. Yal wa d idles-ines, yal wa d Igennawen-ines. Ayγer taẓallit n ugeffur tṣeḥḥa, tameγra n Wanẓar xaṭi ? Ayγer win ur nettamnen ara s Wanẓar ur s-sawalan ara medden akafri ? Ayγer ttesteḥin s Wanẓar ass-a Leqbayel ? Ayγer Anẓar ur yesεi ara ddula, ula d netta, ara s-igen ccan ? Ayγer arraw-is assagi umnen s ugennaw abeṛṛani, ğğan win-nsen ? Ayγer mazal ğğan Leqbayel wiyaḍ ssawalen i imezwura-nsen lğuhala ? Melmi akka ijehlen ? Aniwa i wwḍen γer tmurt-is, kksen-as Igennawen-is, ḥettmen-as Anẓar ?

Maca akka, ula d Igennawen, nettamen kan s win ssdarayen ujenwi, ddula d lεeskeṛ.

Yenna-yas wudrig : ma triḍ ad tqadreḍ agdud, issefk-ak zwar ad tqadṛeḍ imutuyen-ines d tmucuha-ines.

Ameziane Kezzar / Mohand Lounaci

(Amagrad-a yeffeɣ tikkelt tamezwarut di usmel: marenostrumarcadia)

Amagrad-a yeffeɣ tikkelt tamezwarut deg usmel:  Tazawart.com

rédaction
ADMINISTRATOR
PROFILE

Voir aussi

Latest Posts

Top Authors

Most Commented

Featured Videos