Awal ɣef Dda Rachid Aliche

Awal ɣef Dda Rachid Aliche

Ameskar amenzu n ugal s teqbaylit, mass Rachid Aliche, d win i ɣ-yeǧǧan ɣef 55 n yiseggasen deg tudert-is.

Ilul Rachid Aliche, ass n 07 ibrir 1953, deg Tgemmunt Ʃazzuz n At Maḥmud (At Dwala).

Ilmed  aswir-is asdawan deg tesdawit n Lezzayer tamanaɣt, iseggasen-nni n 1970. Illa s idisan n Dda L’Mulud n At Mɛammaṛ i ɣur d-yelmed timsirin n tmaziɣt i iskker deg tesdawit talemmast n Lezzayer.

Isker mass Aliche ungal “Asfel” deg useggas n 1981 d wungal “Faffa” deg useggas n 1986. Rachid Aliche yeskker tuget n tedwilin tidelsanin deg umaṭṭaf wis II (chaine II); maca d afus-nni i iger ɣer tsekla tirawt taqbaylit i yis-s-d-yufrar ugar.

Rachid Aliche iḍfeṛ tizrawin tunnigin deg taɣult n Uẓṛuran, yewwi-d Agerdas n Tezrawin Tunnigin (DES) n Uɣaran (Physique) seg tesdawit n Lezzayer tamanaɣt, Agerdas n tezrawin tisdawanin n Tsekla deg Lyon-II, yiwet n tesdawit anda daɣen i yeḍfeṛ ilmuden isnilsiyen ifriqen, n tesnazmult d tezrawt n l’Ethnologie.

Am akken yeḍfeṛ timsirin deg tutlayt talalmanit (Tanaga n Usuday Goethe n Lezzayer).Timerna-yines s annar n umennuɣ mgal asenger n tsekla taqbaylit d afud ameqqran i-mi Asfel, ungal-is amenzu, d win i isersen ticraḍ timenza ɣef twenza n tlalit n tewsit taneglant s Teqbaylit. Ungal n Dda Rachid yegla-d s wungalen-nniḍen i Tsekla Taqbaylit : am « Askuti » n Said Sadi d « Iḍ d wass » n Amer Mezdad.

Tuṭṭfa deg tewsit am tagi d yiwet n tiɣilit tamaɣurt deg ubrid-is, tsekla taqbaylit, ɣer sdat, azgen n tmiḍi seg wasmi yella yura Belaid At Ʃli. Tawsit taneglant teggar-d amynut deg yisental n yinaw d wayen akk yurzen ɣer tutlayt.

Sin wungalen-nni i d-yura, s teqbaylit, Rachid Aliche, dɣa “Asfel”, d wid i ɣef ɣmant tecraḍ n leqdic n umenzu ɣef unnar n tira s teqbaylit : tira iwatan, tutlayt i deg ntant acḥal n tyitwin, ɣas s tin n tismin tettwajber-d seg tingara, maca glan-d yidsen ayla-nsen seg uẓaṛ, ṭṭfen-d seg yiri n tɣerma tamaziɣt, llin-as irebbi i talsa s umata. I sin yidsen, wungalen n Aliche, fkan anzi d ungalen yesfaltayen ɣer yimal iwatan, i d-yessekfalen aẓaṛ n wi k-ilan.

I wakken ad mlilen iceqfan, anadi yezger akk-in i tmurt n Leqbayel, d win yunagen ɣer Tahert (Tiaret), Гadames (Ghadamès), Tuggurt (Touggourt) … atg. Anadi-yagi i yezgren tilisa n uxxam ɣer tamiwin-nniḍen n tmazɣa d Azamul n tayri am win yettnadin ɣef tin i izedɣen ul (nettat = unti)..

Mass Aliche yeskker ddeqs n tedwilin ɣef tutlayt d tɣerma tamaziɣt, seg useggas 1990, akk d yiwet n tedwilt i Yimecṭaḥ (Ccna, Uraren,Tukksa ɣef wul, Awal “tanfalit”, Tasekla); seg 1998, yeskker yiwet n tedwilt tamalast i deg d-yettawi ɣef  tɣerma d yidles n yilagrakal.

Mass Aliche Rachid yella seg Yimedrawen n Useqqamu Unnig n Timmuzɣa (HCA) n wasmi yella d Amaray-is Amatu, mass Idir Ait Amran.

Rachjd Aliche yedder tallit-nni n tlalit n Yiselmaden imezwura n Tutlayt d Yidles Amaziɣ i d-yeffɣen seg Ben Aknun. Ur sen-yebri yara mass Aliche i Yiselmaden -nni armi d asmi i rekden yakk deg wadeg-nsen anda selmaden tamaziɣt-nni. Ddeqs n temliliyin i d-yedder d Yiselmaden n Tutlayt d Yidles Amaziɣ deg Ben Aknun d El Qubba.

Seg tnaga-w ɣef Dda Rachid a d-yali waya :

– Isawal-iyi Alɣuɣ,

– Isuddes-iyi-d tagnit anda i d-giɣ yiwet n temsirt n Tmaziɣt deg Tesnawit “Hassiba..” n El Qubba, sdat Iselmaden n tutlayt d yidles amaziɣ. Wwiɣ-d yiwet n temsirt n tɣuri tazrawt, d yinelmaden n uswir wis 4 n Uɣerbaz alemmas. Aḍris, ddmeɣ-t-id seg ungal n Amer Mezdad “Iḍ d wass” i d-yewwin ɣef usentel n Tezdemt deg Lyali.

– D netta neɣ d Madjid Ben Belkacem, aselmad n tmaziɣt, anardal deg Ṛṛadyu tis II, i d-yettakken tisebɣas i yiselmaden n tmaziɣt d yisallan ɣef yakk timliliyin i sen-d-yettwasuddsen d tinanin deg Tesnawiyen n Ben Aknun d El Qubba.

– Yull-iyi asmi zegreɣ seg tmurt n Leqbayel ɣer tmanaɣt ad slemdeɣ iles d yidles amaziɣ am akken asmi ṭṭfeɣ adeg-iw deg tesnawit n Frantz Fanon, ur iyi-gdil ara, s netta s Grain Arezqi, d wid i yufiɣ deg tmasit am tin n wass-nni,

Rachid Aliche seg Yimeskkaren n Tiddukla « TALA » deg Lezzayer tamanaɣt s idisan n wudmawen imaɣuren n tẓuṛi, tasekla d yidles amaziɣ.

Anda-tt Tala-nni?

Tajmilt i Mass Aliche Rachid, tin i wumi ur izemmer a s-d-yemḥilleq Yilagrakal.
 
F. At Muḥend.

Gm : Tanemmirt i Ueddakel Mohand Ben Sadok i yi-d-yuznen tazdemt n yisallan ɣef tudet n mass Aliche Rachid. Ayen nura fellas drus.

win yessnen « la source  » n umagrad a , aɣ tt-id yefk

About The Author

Related posts