728 x 90

Ayen ara yi-d-tḥettmeḍ laẓ-ik ?!

Ayen ara yi-d-tḥettmeḍ laẓ-ik ?!

Azal di taddart yekkes sser i lḥal, iṭij yessuffeɣ-d arquqen-is, ula d tili tettnadi amḍiq ideg ara teddariḍ. Ibẓaẓ ssekren tameɣra, ssɛuẓẓgen ula d imeẓẓaɣ n tasaft. Ixxamen ttfurrun, iberdan yuɣ deg-sen uzaylal.

Ɛmar bu yefden seg uxxam yeffeɣ-d ɣer tejmaɛt lewhi n leṭnac, deg uxxam ur yufi ara ula d acu ara yečč, yeḍmeɛ ad d-yemlil yiwen seg warraw n taddart-is ad as-d-yefk tilqemt n weɣrum…yelluẓ almi ula d iẓerman-is ugin ad ssusmen, ur yufi ara d acu ara yečč, mačči imi ur yesɛi ara idrimen, ala! d takuzint i as-belɛen, nnan-as:  » d remḍan, ilaq ad tuẓumeḍ, tura kečč d awessur… »

Maɛna Ɛmar bu yefden amek ara s-yessefhem i temɣart n yemma-s belli netta mačči d ineslem, ur yumin d rebbi, s nnbi d tmucuha d-ḥekkun wat yiwen (les monothéistes), amek ara s-yessefhem belli ddin-is d winna n lejdud-is, yettamen s Unẓar akked Iɛessasen, ɣur-s ur telli lǧennet ur telli laxert… !

Ddin-is ur as-d-yeqqar  » qim i laẓ », ur as-d-yeqqar « wwet tameṭṭut-ik, neɣ mayella ulac aman ḥukk s weẓru… » Ddin-is d leḥder deg wayen i as-d-yezzin; ad iḥader tiẓgi, iɣerṣiwen akked yimdanen… ayen nniḍen d ccɣel n wemdan.

Ɛmar bu yefden ɣer berra mi d-yeffeɣ, ur d-yufi ula d yiwen, nnejmaɛen yakk ɣer yexxamen-nnsen,ula d amcic neɣ aydi ur yelli di berra, yufa-d iman-is weḥd-s akked yiṭij, mmesmuqalen netta d yiṭij, Ɛmar bu yefden yebra i wallen-is. Imuqel akin akka sani ara yerr, almi d-yemmekta amḍiq-nni ideg yettɣimi netta akked yimdukkal-is, yewwet ihuz iman-is, yeṭṭef abrid ɣer wemḍiq-nni.

Deg ubrid mi iteddu, ɣer tama n yeɣẓer yesla i lhafa, tazwara yenna-yas « ahat d aydi i yettnadin d acu ara yečč » yewwet ikemmel abrid, allaɣ-is iceyyeɛ-it ɣer uɛebbuḍ-is, yettxemmim kan amek ara d-yaf ayen ara yečč.

Iteddu, yettxemmim, almi t-id-yesduqqes Ɛemmi-s Ameqran, yuli-d seg yeɣẓer, imi-s yeččur d učči, ad tɣileḍ d ifeẓ i yettara, akken kan d-iwala Ɛmar bu yefden, yedduqes, ineggez am win ara yettwaṭfen mi ara yexdem kra ur nlaq ara.Ɛmar yefhem, ɛemmi-s, belli d učči i itett.

Ɛmar u yefden yewhem amek akka Ɛemmi-s ireggel am wuccen ɣer yeɣẓer akken ad yečč aɣrum, amek almi ur itett ara deg uxxam-is, anwa neɣ d acu i yugad? Axxam ines maɛna i wakken ad yečč ilaq ad iruḥ ɣer yeɣẓer ad yeffer am win yettakren !

Ɛmar bu yefden imi ur ixeddem ara, d imawlan-is i t-yettɛicin, ur yebɣi ara ad yennaɣ yid-sen ma yella yečč remḍan imawlan-is ugin, yugad ad t-ssuffɣen seg uxxam; ur itett, ur yeggan…!

Ɛmar bu yefden yewwet iɛedda amzun am wakken ulac acu yellan, iteddu yettxemmim ɣef tedyant-agi n laẓn bessif, amek akka ad qqimen kan akka ad ak-d-inin d ayen aggur-agi ulac čči deg wass! d ayen ur nkeččem ɣer wallaɣ n win yettxemmimen.

ilaq ad d-yaf tifrat, ilaq at taddart-is ad ten-yerr win yebɣan ad yeqqim i laẓ ad yeqqim, wayeḍ ma yella ur yebɣi ara yiwen ur t-ittḥettim ad yeqqim i laẓ.

« Aɛebbuḍ yiwen, aẓekka yiwen » akka i yeqqar…

Irnaten Murad

rédaction
ADMINISTRATOR
PROFILE

Voir aussi

Latest Posts

Top Authors

Most Commented

Featured Videos