728 x 90

D acu d Aɣlan ?

D acu d Aɣlan ?

Wa d tukkist seg usarag i d-yefka « Ernest Renan » ass n 11 meɣres 1882 deg tesdawit taparizyanit n « La Sorbonne ».

« Aɣlan d iman, d tigejdit taruḥanit. Snat n tɣawsiwin, deg tidet, i d-ibennun iman-a, tigejdit-a taruḥanit.

Yiwet attan deg zik, tayeḍ tezdeɣ tura. Yiwet tessezdi imdanen s waṭas n yismektiyen i yesɛan, tayeḍ d lebɣi n tura, d lḥir n tudert akken jmiɛ, d lebɣi n ukemmel n werfad s igenni ayen i ɣ-d-ǧǧan imezwura yessezdi-aɣ. Amdan, ay imdanen, ur d-yesnulfu ara. Aɣlan am wemdan, d leqrar n waṭas n leqrun n leɛtab,n yiseflan, n tayri. Taẓẓalit i yimezwura d azref ur nezmir ad t-yekkes yiwen; d lejdud i ɣ-d-ifeṣṣlen akken nella akka tura. Amezruy, irgazen, iseɣ is-s ara nzuxx, d wi i d sɛaya n yemdanen akken ad snernin tikti n weɣlan-nsen. Amezruy i ɣ-yessizwiɣen udmawen-nneɣ i ɣ-yezdin seg zik, lebɣi i ɣ-icerken akka tura, asbeddi n temsal timeqranin s tiwizi, lebɣi n ukemmel seg webrid-a, atan d acu ilaqen i waken ad nili d aɣref. Nettzuxxu s leɛtab i neɛteb, s ideddicen i ɣ-iqerḥen. Nḥemmel axxam i d-nebna, win ara-d-neǧǧ i yineggura. Ccna n Sparte: “Aql-aɣ d ayen tellim, ad nili d ayen tellam”, ɣas akken d afessas, d netta i d imseɣret n yal tamurt.

Zik, d ttrika n zzux d ndamat i ɣ-yezdin, azekka d yiwen n webrid ara nawi, lqerḥ, taḍsa, tirga i ɣ-yesdukkulen, atan wayen yifen assezdi n ladwan d tlisa i sbeddent tikta tistratijiyin; atan wayen nfehhem ɣas nemxallaf deg ccetla d tmeslayt. Nniɣ-d seglinna: “lqerḥ i ɣ-yesdukklen”; ih, lqerḥ yesdukkul ugar n lferḥ. Ladɣa ismektiyen n tmura, leɣbayen ifen nezzeh lerbaḥ, axaṭer ttḥettimen-aɣ ad nili ɣer yidis n tmurt, slalayen-d tadukli gar-aneɣ.

Aɣlan, ihi, d tiwizi meqqren, i d-yettlalen seg yiseflan i nefka d wid daɣen ara nefk sya d asawen. Aɣlan yeḥwaǧ iḍelli, dacu kan assa yeḥwaǧ yiwet n tɣawsa s wazal-is: aqbal d lebɣi n tidet n ukemmel n tudert jmiɛ. Amdan yessefk ad iwekked tudert-is yal ass, akken daɣen aɣlan, tudert-is d tifranin n yal ass. Deg usettef n tekta i wen-d-mliɣ, aɣlan ur yugar agellid deg wezref ad s-yinin i taddart “Kemm d ayl-aw, ad kem-awiɣ”. Ɣer-nneɣ, taddart d imezdaɣ n weɣlan, axaṭer ma yella win yessefk ad ncawer deg taluft-a d amezdaɣ, d netta i ilan azref. Aɣlan weǧin deg lfayda-s assezdi neɣ tuṭtfa n tmurt sennig wul-is. Lebɣi n tmura, ulac akk ayen nniḍen, d netta kan i d llsas, d netta kan iɣer yessefk ad d-nettuɣal yal tikelt.

(…)

Ad siwezleɣ awal, ay atma. Amdan ur yelli d akli n ccetla-s, n tutlayt-is, neɣ n ddin-is, n wamek ttazalen isaffen neɣ amek i bedden idurar. Tirect n yemdanen, s wallaɣ-is iṣeḥḥan d wul-is yeḥman, txelleq-d yiwen rruḥ umɛin, nefka-as isem n weɣlan. Skud rruḥ-a umɛin yesbanay-d afud-is s yiseflan i yettḥettimen i wemdan ad yeknu i tirect, dɣa ɣer-s azref ad yili, ad ibedd. Ma yella cekk ɣef tlisa-s, ciwret imezdaɣ iɣef tettnaɣem. Ɣers-sen azref ad d-inin awal-nsen deg taluft. Atan d acu ara d-yesseḍsen imeqranen-a n tsertit, wid akken ur nɣelleḍ ara ɣas akken tudert-nsen yakk d tuccḍa, s tinzert-nsen seglalzen akal-nneɣ deg lqaɛa. “Ad tciwrem imezdaɣ, aha ziɣ! Atenta daɣen tikta-nni tiḍeɛfanin n Fransa i yebɣan ad ibeddlen ssyasa d lgirra s ttawilat iḥerfiyen am irellucen n warrac imecṭaḥ.” Rǧut, ay atma, anfet-as i leḥkem-a n isertiyen i ɣ-d-yettwalin akka sufella; eyyaw ad nissinet ad nqabel tamḥeqranit n wid iǧehden. Ahat sdeffir mi ara nessalay nesṭaray mebla ma newweḍ ɣer kra imeɛnen, ad d-nuɣal ɣer tfessassin-nni i nessen zik. Abrid is-s ara nesɛu lḥeqq azekka, deg kra n tsaɛtin, yessefk ad nissin ad nuɣal ɣer teqdimin. »

Ernest Renan

Assuqel: Berkus Tiwal.

Amagrad-a yeffeɣ tikkelt tamezwarut deg usmel: Tazwart.com

rédaction
ADMINISTRATOR
PROFILE

Voir aussi

Latest Posts

Top Authors

Most Commented

Featured Videos