Taqbaylit

Irab wexxam-nni !

admin
Proposé par admin

Sliɣ i ucewwiq mi icerreg igenni, yecba tiɣwist n win yettewten, tiyita iɣef ur yedmi. Yid-s ibubb ayen yerba yizli, yenfel, yesraffeg ur iban sani.

Lemmer yeɣli ujgu ibedd yinzi, lemmer yefla uqermud, iban-d usekkil, tili ad as-nini : “ ccah i yiḍelli!”

Ay axxam, temdel tewwurt-ik ɣef tmucuha d yizlan, telli i tṣurtin d werkaɛ i waḍu yeḥman. Seg ṭṭaq-ik ur d-yegri uḍilli, dayen temmundel tmuɣli, imi i aɣ-yettwakkes berra. D acu ara k-d-yexdem dduḥ n wesɣar a llufan, ma yella zzuzunen-k s qassaman?! D acu-yi-ken ay ikufan, ma yella aɛbbuḍ-nwen ur t-sserwan yirden neɣ iniɣman, kenwi ma yella teṭtamaɛem ttmer d wayen-nniḍen?! I wimi-k ay ayeddid ma yella rran-k i luḍu, ma yella ssiriden iyennaten-nsen yes-sek? I kečč a lkanun, d acu ara d-yexdem i weqcic yiɣed n Waɣzen akked Teryel ma yella sxerben-ak timucuha? I wumi-t lḥamu ma yella ulawen d isemmaḍen? 

Ɣas kref ay aẓeṭṭa, rreẓ a tayaẓilt, ibrik a taduṭ, rrkut ay ifeggagen ma yella d iɛdawen ara yelsen abernus ! I kemm a tasga, ma yella telliḍ kan i wemɣar yettweṣṣin ɣef ṭṭariqa, i wumi-kem? 

S xerben-aɣ asekkil i tefyirt, nekkni nettnadi lmeɛna n tudert! Axxam mačči d aẓru, axxam mačči d aqermud akked lkanun, ifeggagen, amnaṛ neɣ tasga. Axxam d ayen yellan deg-s, d ayen ara yeddem weqcic s uzekka. Axxam mačči d tawwurt neɣ d ṭṭaq, axxam d anda yessufuɣ ṭṭaq akked tewwurt.

Ru ay aqbayli ɣef webrid ur nessufuɣ, mačči ɣef webrid ma yeččur d uguren! Ru ay aqbayli ɣef uzekka ma yella rran-ak-t d aẓekka mačči ɣef yiḍelli ! Ru ɣef wakal teǧǧiḍ, ruɣ ɣef yimal mi t-tettnadiḍ deg yiḍelli! Aqermud d ikufan melmi i ak-yahwa ad ten-txedmeḍ. Abernus, aydid akked tjegwa ma yella ruḥen, issebleɛ-iten zzman tudert ur tḥebbes ara. Tudert ad teḥbes ass ideg ara tuɣaleḍ d wayeḍ. Ad tnegreḍ ay aqbayli ass ideg ara tekkateḍ akal s wenyir-ik mačči s uqabac. ass ideg ara teẓẓuḍ ayen ara teččeḍ. 

Ɣas ad aɣ-hudden axxam, ad nesbedd tawacult! 

Ɣas ad hudden arrac, ad nesbedd temẓi! 

Ɣas ad rẓen dduḥ, ad d-nrebbi llufan! 

 Irnaten Murad