728 x 90

Mueḥnd u Yeḥya : … et la Révolution teţkemmil !

Mueḥnd u Yeḥya : … et la Révolution teţkemmil !

Win ijebbden amrar à force à force, yiwen wass ad d-yeqqers, win irekkin tixmirt à force à force yiwen wass a ţ-yečč, win ixeddmen à force à force yiwen wass ad yeɛyu !

Aha tura suffɣet-d tiportfayin-nwen, neɣ ? Yeḥḥu ! Dayen waqila iserreḥ yiles-iw.

Asmi akken nxeddem le théâtre, awah winna i ɣ-yewten nekkni, yewwi yid-es tasaruţ, ccaɛb iruḥ deg-sent, nekkni …

Yiwen wass ruḥeɣ ad lesqeɣ les affiches. Kecmeɣ ɣer lqahwa dagi di Pwaten, ufiɣ amɛellem deffir ukuntwar, ki sseltan. Yenna-d dacu ara tesweḍ ?

Nekkini leqhawi-yagi, c’est rare ad kecmeɣ ɣer lqahwa.

Nniɣas : Wellah ma ẓriɣ!

Yenna-d : Xemmem !

Yiwen aɛni yusa-d si tmurt melmi kan, ur yesɛi ara lekwaɣeḍ. Déja deg uswiɛ-nni tẓeyyer aṭas ɣef les Algériens. Yessirid lkisan llah llah kan. Yenna-yi-d wemɛellem dacu ara tesweḍ ?

Nekkini leqhawi-yagi, c’est rare ad kecmeɣ ɣer lqahwa.

Nniɣ-as : Euh !

Yenna-yi-d : Xemem , xemmem.

Yenna-yas, hata-n kan, i winna : Wigi tɛeddan, wigi ! Eyyaw lubyan taqurant ! A-s-fkeɣ lxedma ţ-tikci, yerna ilaq a-t-ţxelliseɣ.

Lqahwa terka maččI d kra, wagi yakk d le benefice. Akelyan drus i gellan, ijmaɛ-d laɛqel-ik ţtuɣ yakk les affiches-nni. Lukan ţ-tamɣart i sen-id-yewqem dagi aţ-ţafeḍ ur teţţafeḍ ara abrid, ad d-yekcem ukliyan ur tesɛiḍ anida ara iruḥ, alors ţruḥun-d ɣer dagi kan. Mi d-yekcem ukliyan : _ Dacu ara tesweḍ ?

Nekkini leqhawi-yagi, c’est rare ad kecmeɣ ɣer lqahwa.

Nniɣ-as : Euh ! Wellah ma ẓriɣ !

Yenna-d : Xemmem xemmem, ɣur-k le temps. Lɛib d winna yeţţakren neɣ d win yeskiddiben, d winna i d lɛib. Win izemren ad yexdem yeţţagi ad yexdem, d afenyan, winna ulac lɛib i t-yifen. Win yellan d igellil surtout ma ixeddem, winna mačči d lɛib, au contraire, d argaz !

-ţ-tarkast, wi !

-A ur kfun fell-aneɣ yergazen am neţţa, keččini tura !

Lqahwa terka, wissen ma nniɣ-awen-id. Yugar ibeɛɛac a les clients : twerrek ddunit, kessen ţtawin ţtaran kann akka, amzun d axxam-nsen.

-Keččini tura, tewwdeḍ-d ɣer dagi, teṭtseḍ, teččiḍ, teswiḍ, lxedma aql-ak txeddmeḍ, labas i telliḍ , a-ţḥemdeḍ Rebbi i k id-yessemlalen yidi. Ih ! d mmi-s n tmurt-ik nekkini, ur ţzembil ara fell-i ! Dacu ara tesweḍ ?

Nekkini leqhawi-yagi, c’est rare ad kecmeɣ ɣer lqahwa. Dacu ara sweɣ tura ?

Nniɣ-as: Win ijebbden amrar à forceà force, yiwen wass ad d-yeqqers.

Yenna-d: Amrar, amrar ? Amrar !

Jebdeɣ-d amar ad yenhez wedrar.

Llan 4 neɣ 5 qqimen ɣer ṭtabla, tessen lbirra, laɛben lkaṛta. Wet kan, wet kan, teḥma ddaɛwa. Yiwen ad d-yesttentun di tmacint-nni ileḥḥun s 20 n duṛu. Baci ad awen-iniɣ amek yebda neɣ amek yekfa, wellah ma zemreɣ, ur fhimeɣ ara dacu i d-yeqqar.

Iɛedda-d uɣerda, amcic nniqal yeṭtes, yelli-d yiwet n tiṭ, dɣa yuɣal i iḍes. Dayen meskin twet-it tmaggirt, terna-yas llaqya : yesraɛ kan yeqqim.

-Amrar, amrar, amrar. Ihh! Ziɣ d amrar i k-id-yecqan keččini! Degmi akkagi, ɣer wigi, seɣres ɣef yiman-ik, wigi ? Amrar-nsen ɣezzif, wgi ! Atenan atenan, aɛni d aḥemmel i yi-ḥemmlen, mi mreḥba tamara, ula aniɣer ruḥen. Zik-nni, wi, asmi xeddmen. Wamma tura ! Zik-nni win i d-yeṭtfen ccehriya-s, a-ţ-id-yawi alamma d afus-iw. A-s-iniɣ amendder ma ur ak-ɣlin ara deg webrid ! A d-yini: aha’, wellah ma ɣlin iyi. Anɛam ih ! Wamma tura, si ssbaḥ alamma ţ-tameddit, a-ten-id tafeḍ sqerqren-iyi dagi am tyuzaḍ, mazal-ik ! Dacu ara tesweḍ tura ?

Nekkini leqhawi-yagi, c’est rare ad kecmeɣ ɣer lqahwa.

Nniɣ-as : E !

Yiwen aɛni yexser, neɣ amek, sbbaben-as kulecc. Dɣa yessker čaqlala, yenna-yas : Allih, nɛeldin n laɛb am wagi !

Dɣa frefren yakk, amɛellem yuggad a-s-ččen aṭurni neɣ sin, yewwed-iten-id din din. Lḥasun, ixus kan wemɣar-nni yellan si tribunal n Tizi-Wezzu, ur ẓriɣ ara ma mazal-it. Yewqaɛ ṭalaɛ habeṭ, c’est à dire teggumma a ţefru, mačči alluy d uẓubbu a les brobros, nɛeldin n le berberisme n taɛkum.

Winna i s-yennan nɛeldin laɛb am wagi ixelles-iten quand même. Yenna-yas: Awi-d tura, ernu-d un coup. Bla Rebbi ma qqleɣ ad d-ḍewreɣ ɣer dagi .Ó

Amɛellem yuɣal ɣer deffir ukuntwar, ɣer la voûte (?), yerna-yas-d un coup.

Ad ṭtfeɣ kan imi-w, ala, nniɣ-as : Waqila sruḥen-ak akliyan !

Yenna-d : Tameddit a-t-id-tafeḍ da. Sanda ara iruḥ uqadum uxessat, ɣer yemma-s ahat ? Kestubwa?

Nekkini leqhawi-yagi, am akken i wen-id-nniɣ, c’est rare ad kecmeɣ ɣer lqahwa.

-Dacu ara sweɣ tura?

-Wellah ma ẓriɣ !

Amɛellem ur t-yaǧǧib ara lḥal. Yenna-d: A-ţeṭtdeḍ, neɣ a-ţeffɣeḍ!

Hata wayen ur ḥemleɣ ara ! Nniɣ-as: Aɛni d yemma kečcini akken ad yi-tessuṭtdeḍ ?

Yenna-d: Aɛni d yemma-k nekkini akken ad yi-teqqimeḍ dagi baṭel ?

Yerna ruḥeɣ-d ad lesqeɣ les affiches ! ṭtfeɣ kan imi-w, refdeɣ tabalizt-iw, nniɣ-as : Ihi aql-i ffɣeɣ !

Yenna-d : Lukan les clients yakk akka am kečcini, ad sɛuɣ lqahwa di Pwaten !

Xemmeɣ, xemmeɣ, ufiɣ c’est exact. Et la Révolution continue !

Muhya

rédaction
ADMINISTRATOR
PROFILE

Voir aussi

Latest Posts

Top Authors

Most Commented

Featured Videos