Sers anay, rrfed adlis !

Sers anay, rrfed adlis !

Di tmurt-ik ttwakaren warrac akked tullas, di taddart-ik yettefrurux, imeqqi uččamar, fettint tikta tiberkanin. ɣur-wen, layas yekref ulawen. Ula d isental  » les sujets » iɣef tettmeslayeḍ deg uɣalad n tejmaɛt si lezzayer i d-yusa ttesriḥ. Taddart-ik teččur d iqazzaben, d iceyyaten, icekkamen, icallamen… ttawin ayen yeḍran di taddart i ujadarmi-nni i ak-yenɣan lǧar-ik deg iseggasen-nni iberkanen asmi akken tettqabaleḍ rṣas s ifassen d ilmawen.

ANNAR d taddart-ik, d akal-ik, mačči d tikli di tmesbaniyin! ANNAR d tutlayt-ik, ANNAR d tasekla-nni-inek i teǧǧiḍ tettezzer deg iciwi n tatut. AANNAR d ansayen i d-ǧǧan lejdud-ik, uqbel ad d-ilal llah-agi i s tettgallaḍ ass-a. Mačči s jmaɛliman ara nerfed iqerray-nneɣ neɣ s ara nzux, s usnulfu d uxemmem! ameyyez d uḥebber !

Amennuɣ ur yelli s ucettiḍ, ma yella trefdeḍ-t; d acu ara k-d-yexdem llun azegzaw ma yella akal-ik yeqqur, tiẓegwa-k nnegrent ? D acu ara k-yeg uzeggaɣ, ma yella idammen-ik ur ḥemmun ara ɣef tutlayt akked d yedles-inek? d acu ara k-d-yeg ujenjari ( azegzaw am igenni) ma yella seg igenni-k teẓɛeḍ Anẓar, tegreḍ irebbi i llah d wayen d-yezzuɣer?

Aṣlugu yettuɣal d taqlaṭ ma yella teqqimeḍ kan deg-s. Ayen i treggleḍ ɣef tidet i k-yettaqraḥen, tettazzaleḍ ɣer lekdeb-nni tenwiḍ yessefraḥ-ik? Ayen ass-a tḥemmleḍ kan ad d-tbaneḍ, ad k-walin ɣas ur yelli wayen d-tenniḍ neɣ txedmeḍ?

Tewwim-d lewḥuc n waɛraben-inselmen ɣer tmucuha-nneɣ, tebram-asen di tẓegwa-nneɣ, tettrum mi awen-ččan arraw-nwen!

Tagrawla mačči s ucettiḍ, tagrawla di taẓeyt n wawal, d telqay n tikta, d afus akkeḍ uḍar ma yella ddukklen.
Teseččayem lewḥuc-nnsen, i nekkni teqqarem « akit! »

Tettakem lḥeqq i yeɛdawen, tettarram-aɣ-ten d iḥbiben s tsertit ur nemɛin.

Tesɛam lḥeqq, ur teẓrim amek ara tnadim fell-as! Deg ubrid ay tellam, maɛna txelqem-d uguren! Twalam miḥlal, ur teẓrim amek ara t-tawḍem!

Akken tesɛiḍ akal, ur teẓriḍ azal-is, tesɛiḍ tutlayt ur tessineḍ lqima-s, tkesbeḍ tasekla, ur teẓriḍ ay teswa.

Win ara yemten ɣef wayen ur yeẓri, amzun yenɣa iman-is!

Allaɣ yebɣa ad yebnu, afus yetthuddu, tenwam yes-neɣ ad tali!

Serset anay refdet adlis, yerǧa-yaɣ uzekka.

Irnaten Murad

About The Author

Related posts