728 x 90

Sselsen-ak taqlaṭ, kečč tenwiḍ d takrabaṭ

Sselsen-ak taqlaṭ, kečč tenwiḍ d takrabaṭ
Teddiḍ d wid yenɣan yemma-k (Kahina), teddiḍ d wid yerran baba-k d akli. Tessneḍ ad tɣummeḍ lǧerḥ s yimi, teẓriḍ idim ad ak-d-yesmekti ayen akkenni iɣef treggleḍ.
Iḍ ideg telliḍ, ur yufi abrid i ɣelluy.
Mačči alamma telliḍ d azrem i wakken ad tesɛuḍ ssem! Mačči alamma telliḍ d aɣyul i wakken ad tettwanehreḍ. Tettawiḍ lexbarat n taddart i wid imegglen tafsut, teznuzuḍ atmaten-ik, taddart-ik akal n lejdud-ik, awi-d kan ad ak-sselsen taqlaṭ, ad k-qeblen gar-asen. D tarzeft i asen-tettawiḍ iqannan, yal tikkelt trekkḍeḍ wid-ik, awi-d kan ad k-id-mmuqlen isiditen-inek. Ur ttagad, mačči weḥd-k ay telliḍ, yal taddart tesɛa iqazzaben am kečč; llan deg igrawen n taddart, llan di lamiri, llan deg yal amḍiq… Yes-wen iggulen taddart ur tettnekkar, ur treffed aqerruy-is. Nutni ẓran azal tesɛa taddart, ẓran ala nettat i asen-izemren.
Iqazzaben, iceyyaten, icallamen” d ismawen-agi ara neḍbeɛ ɣef iẓekwan-nwen, d nutni i d agzul n tudert-nwen, tudert-nni ur nesɛi lssas wala ssqef, d tasellawt.
Ay iqeffafen ɣer nnger-nnsen! Agdud dayen tura yuki, tudrin dduqsent-d, faqent s tezlatin n tatut i s tent-ssegnem ; 54, 62 wid terram d irgazen, nutni ur llin. Seg-wen nnulfan-d ula d wid n 80, tanekkra-nni wwin ɣer miḥlal ur nessuffuɣ! Nettnaɣ ɣef yidles (ccḍeḥ d ccna…) nettu nekkwa d wakal. Teddam d tislatin, tebɣam ad aɣ-t-awim d irbiben. Ay icallamen!
Ma yella zik ur ḥwaǧen ara leḥbas, ahat imi ur sɛin ara timital-nwen. Ma yella zik ur urin ara ɣef wid ken-yecban, ass-a tella tira, deg umezruy aberkan ara ken-neḍbeɛ akken yiwen ur ken-iseffeḍ. S yes-wen i aɣ-kkaten, s yes-wen i aɣ-ttafen abrid, ma yella nunef-awen ad aɣ-teglum deg usyax, ad nemmir ɣer wanu-nni ideg d-kkren.
Uɣen-ken ur ken-sawmen, tegrem iman-nwen ɣer rreḥba, teznuzum wid-nwen. Ula d tezzweɣ teǧǧa udmawen-nnwen.
Ih, zzenzet tudrin-nwen, ernut arraw-nwen, tiyemmatin akked tlawin-nwen… maɛna, ad d-yas wass ideg ara tbeddel tegnit. Tawwurt-agi i d-tettaram fell-aɣ, yewwas ad telddi ɣer wanda-nniḍen. Abrid-agi i aɣ-tregglem, yewwas ad aɣ-yessuffeɣ sanda nniḍen, ad aɣ-yawi ɣer wemḍiq-nni ideg ur telli ccetla-nwen.
Ad txelṣem ur ttagadet.
Irnaten Murad
rédaction
ADMINISTRATOR
PROFILE

Voir aussi

Latest Posts

Top Authors

Most Commented

Featured Videos