728 x 90

Tasnafsit : Tazmert n uxemmem ufrar

Tasnafsit :  Tazmert n uxemmem ufrar

Seg ass-a d assawen,Mass Larbi Yaḥyun,ameɣnas,amaru,aselmad n Teqbaylit ad yettawi sya ɣer dda ameslay ɣef  »La Psychologie et le développementent personnel »
Atan ɣer-wen uḍris amezwaru :

Aveddel yekcem deg tikli tagamant n tudert, daymi ddunit tezga tettemhaz, tettveddil. Ayen akk yettidiren deg lqaɛa, yewwi-d ad yekcem deg umussu n tudert, war leɛtav, war amennuγ, maca s levγi, acku ddunit s timad-is d aveddel. Amussu n tudert, yettawi-d yid-s tanufli, isenfaren imaynuten, asirem d tirga yettuγalen d tilawt.

Aveddel d tamuγli tamaynut, d tikli tamaynut deg uvrid amaynut i ilaq ad neḍfer akken ad nheggi iman-nneγ i tudert n uzekka, tudert n tumert d liser. Ma nevγa, ayγer ala ! Amdan, d ayen i yettxemmim. ‘’Akken i yettxemmim deg wallaγ-is i yettidir ula d tudert-is’’.

Anamek n waya: amdan d lemri n wayen akken i yettxemmim. Tikli-s akked tigawin-is d lγella n uxemmem-is. Am yimγi ara d-yeffγen seg tzerraɛt, war nettat, ur yezmir ad yili.

Ttlalent-d tigawin-nneγ seg tzerraɛin tuffirin n yixemmimen-nneγ, yerna ur zmirent ara ad ḍrunt war tizerraɛin-a. S wakka, yal tikli d yal tigawt ara yeg umdan, d afaris n uxemmem-is. Tigawt, d tajeǧǧigt n uxemmem, tumert akked wurrif d igumma-ines. S wakka, amdan iγellet igumma ẓiden neγ rẓagen n wayen akken yeẓẓa s uxemmem-is. Nekkni akk d tugna n yixemmimen-nneγ.

Ayen akk nedder d wayen ara nidir d nekkni i t-yevnan s tektiwin-nneγ. Ma yella nettxemmim γef wayen n diri, leɛtav d lmerta ad aγ-ḍefren akken i ttemseḍfaren wass d yiḍ, ur aγ-xeṭṭun ara. Ma yella neẓẓa deg-neγ axemmem yelhan, yufraren, talwit d tumert, ad d-neγlen fell-aγ am udfel-nni acevḥan, mi ara d-yeγli γef tmurt, ad yesfeḍ akk ayen yellan berrik. Ihi, d amdan i ivennun u d netta i yessedramen tudert-is s uxemmem-is. Kra ur yelli s lqeḍra neγ kan akka s ugacur.

Deg tevḥirt n yixemmimen-nneγ i d-yesnulfuy imrigen swayes ara yeγḍel tudert-is, maca dinna diγen i yezmer ad yevnu iγaladen iseḥḥan ara iḥudden γef ddunit-is, u ad yeḍmen i yiman-is tudert n talwit, n rrezg d tumert n levda. Tasarut, a-tt-an gar yifassen-nwen, d axemmem-nwen. Ma tevγam ad ffγent tirga-nwen, ad tawḍem γer yiswan-nwen, ili-ken d ufraren deg yixemmimen-nwen, ad teǧǧuǧeg tudert-nwen.

Xemmet, rǧut, sirmet ayen tevγam, ad tawḍem levγi-nwen.

Larbi Yahioun

rédaction
ADMINISTRATOR
PROFILE

Voir aussi

Latest Posts

Top Authors

Most Commented

Featured Videos