728 x 90

Tirza n Wat Laxert.

Tirza n Wat Laxert.

Beddeɣ sdat n tmeqbert allen-iw wehhant akkin s adrar. Lliɣ ɣerqeɣ di ttexmam ɣef wayen i iyi-yecqan di tudert-iw n yal ass, sseftayeɣ awal gar-i d yiman-iw, tedduɣ am win ikecmen ɛemrayen, almi sliɣ i lheffa ɣer daxel n tmeqbert. Di tazwar ɣileɣ d aydi neɣ d aɣersiw nniḍen i ikecmen ɣer daxel. Zziɣ ad waliɣ ayen akka yellan, almi walaɣ ayen ur yezmir laɛqel ad yeqbel, d ayen ara tagi ula d targit : walaɣ iẓekwan leddin yiwen yiwen, tamurt tesuffuɣ-d di lfert-is, tessuffeɣ-d seg uɛebbuḍ-is kra n win yettwaneṭlen dinna am wakken d asusef i ten-id-isusuf wakal. Sburen-d lekfen amellal, ttemcabin d tirni … Tteddun wa deffir wa am wakken yella win yeggullen deg-sen …

Ttɛeddayen sdat-i, wa deffir wayeḍ ad as-tiniḍ d iqeffafen i d-yerzan ɣer tmeɣra … mi i d-mmeslayen yid-i, yal wa d acu iyi-d-yeḥka . kra ḥkan-iyi-d amek mmuten di tallit n Ṛṛuman, amek ɣlin deg wunar n umennuɣ. Wiyaḍ mazal deg-sen ccfawat n wussan-nni ineggura di tudert-nsen asmi tella Tefriqt Ugafa d ayla n Yimaziɣen … Wiyaḍ ulsen-d amek i ɣlin di ṭṭrad akked Uṛumi … ma d wiyaḍ deg-sen mezziyit, deg-sen mazal rriḥa n wussan. Wigi d ilmezyen yeɣlin di tmurt n Yiqbayliyen s terṣaṣin di 2001 …
Gar yifassen-nsen wwin-d tabrat i asen-d-ceggɛen widen-nni nettu … Taddart tettak-iten i tayeḍ, ɣef lexbar ara d-ssiwḍen.

Tamurt-nsen i ttmuqulen, ttmektayen-d tallit asmi leqder yella d imḍebber, asmi i tent-tesdaray tugdut, asmi ẓran d acu-t wazal n umdan, asmi beṭṭu yettili s leɛdel …

Ur yelli win izemren ad iqabel ayen akka i la d-iḍeṛṛun, wid yeddren ur ẓrin ma ugaden neɣ wehmen. Qqimen ttawin lewhi s wallen maca ẓran ilaq ad mmeslayen yid-sen, akken ad ẓren anwi-ten ? d acu i bɣan ? …

Amḍiq i fernen akken ad mmeslayen i wid yeddren d yiwet n luḍa iwumi zzint tzemrin akked tneqlin. Ma yella d adrar, bɣant ad yili d anagi, yerna ẓran-t belli yessen ad yeḥrez lbaḍna. Imɣaren n tudrin wwḍen-d s amḍiq. Ttemsteqsayen ɣef yinebgawen-agi i d-yerzan ɣer-sen ur bnin fell-asen… gar-asen yuẓa-d yiwen, iban d netta ara d-imeslayen s yisem-nsen…

Yenna : « Azul seg wat laxart i kunwi a wid yeddren. »…
Wid iḥedren dinna yebda laman ikeččem s ulawen-nsen ɣas akken tugdi mazal ur teffiɣ ara seg-sen. Din din, ikemmel win ameslay-ines yenna : « aqla-aɣ nusa-d akken kan ad awen-nezzuzen asmekti acku nwala tatut tejɣem aṭas n wayen yeḍran zik-nni. Ad aken-id-nessaki seg yiḍes n meɣrud ideg tɣerqem… Nwala amek tbennun imal-nwen s yiceqfan n yir tirga i awen-d-znuzun yiɛdawen. D wamek testehzayem deg umezruy-nwen… tessufɣem-aɣ seg wallaɣen-nwen, seg yidlisen n umezruy, tettum belli uqbel-nwen d nekkni i yenḥafen … tettuma ayen i awen-d-neǧǧa d ttrika d lamana neɣ d lbaḍna : tutlayt d yidles … Seg-wen acḥal ur ssinen ara ad meslayen tutlayt-nsen, tina i d-ṭṭḍen seg tyemmatin-nsen. Ttun ula d ismawen n yimɣan i d-imeqqin ɣef yiri n yixxamen-nsen… »

Allen-is ččurent d imeṭṭawen,teḥreq tasa-s seg wayen la yettwali, ayen akk i d-ǧǧan yuɣal d taffa yečča uɣyul … iwala amek yezmer umdan ad yenkker iman-is, yerna ad yettaḍsa ; lejdud-is, amezruy, tutlayt akken kan ad yuɣal d wayeḍ…

– Zzman ibeddel, ass-a ur yelli d iḍelli, di tallit-nwen ur tessinem ara Ṛebbi …, gar tidet akked lekdeb ur tessemgardem ara … nessuffeɣ-iken seg yidlisen n umezruy ɛlaxaṭar llan wid iken yifen wigi d Ṛebbi i ten-yextaren.

Yezzi-d ulaxart ɣer deffir, imuqel-it-id yenna-as : « d anwa-k tura kečč ? »…
Yenṭeq ɣer-sen yenna : « amek tqeblem ad tilim d ulli, yerna teqqarem nettnadi ɣef tlelli ? Tqeblem ad awen-d-yini wagi d acu ara txedmem, amek ara teddum ? ahat ula d ayen ara d-tinim ? dayen tura yeǧǧa ṣṣwab imawlan … Amek ara d-yass yiwen seg tmurt ibeɛden ad awen ibeddel ansayen, ad awen-yekkes tutlayt, ad awen-isserzeg idles, yerna ad tessusmem, ad teqqarem « Amaziɣ = argaz ilelli . Nekk ad awen-iniɣ tidet, ur walaɣ argaz, ur walaɣ tilelli deg-wen ».

Yezzi akkin ad yuɣal ansi i d-yekka, akken kan yewwet asurif yessawel-as-d yiwen seg wid iḥedren. Yenna-as-d : « ur ttagad, ur as-qqar nenger, ayen akk i d-teǧǧam ur aɣ-iruḥ maca ur t-nufi ara, aql-aɣ ɣer-s la nteddu, tikli s terdasin acku deg ubrid ṭṭuqten wuguren. Kunwi mazal-iken deg-nneɣ, tellam deg umezruy, tettidirem deg ccfawat-nneɣ. Ma yella d wagi akka yerran iman-is d ameksa, aḥlil yettwaɣ, ittwet sanga ur iḥellu. Xas aṭas i yellan maca drus yidsen. Ad d-yas wass ideg ara mḥun »

Alaxart-nni … yecmumeḥ, awal ur t-id-yerni. Yezzi ɣer deffir, yessekna aqerru-is, yebda tikli ɣer tmeqbert. Dayen tura yuɣal-it-id ussirem, yettkel, yeẓra akken bɣun mmuten neɣ negren yirgazen, ad ilin wiyaḍ.

Murad Irnaten

Ammud n tullisin : Di lǧerra-k ay awal

Tizrigin Achab, 2015 di Tizi Wezzu.

rédaction
ADMINISTRATOR
PROFILE

Voir aussi

Latest Posts

Top Authors

Most Commented

Featured Videos